Juunip ulluisa 23-ianni kommunalbestyrelsip Narsarsuarmi innuttaasunik ataatsimiititsinerani oqaloqatigiinneq mittarfiup 2025-imi nalinginnaasumik angallassinermut matunerata kingorna Narsarsuarmi ineriartortitsisoqassappat pisariaqartitat kissaatillu pillugit saqqummiussanik isumaliutigilluakkanik imaqarpoq.
Borgmester Stine Egede aallarniutigalugu qularutigeqqunngilluinnarpaa Narsarsuarmi ineriartortitsisoqarnissaanik kommunalbestyrelsi tamarmiusoq kissaateqarmat, takornariartitsinikkummi Narsarsuaq assorsuaq periarfissaqarmat. Kommunimi pilersaarut Narsarsuarmut tunngasoq, Qajiittat tungaanut aqquserniorneq kiisalu kuukkut ikaartarfik, tamarmik tassaapput attaveqarnikkut suliassat takornariartitsinerup ineriartortinneqarneranut tapertaasinnaasut, kommunalbestyrelsillu sulissutigiumasai. Stine Egede ilanngullugu oqarpoq takornariartitsineq ineriartortinneqassappat akunnittarfik ullutsinnut naleqquttoq pinngitsoorneqarsinnaanavianngitsoq. Suummi tamarmik imminnut ataqatigiipput.
Innuttaasut assut apeqqutissaqarput kissaateqarlutillu, soorlu eqqagassalerineq pitsaanerusoq, paaqqinnittarfiit amerlanerusut, saviminikut atorluarneqarnissaat, akunnittarfiup nutarterneqarnera kiisalu mittarfiup atorunnaarnissaa sioqqullugu atorfeqarnikkut toqqissisimanissaq ilaatigut kissaatigineqaprut. Narsarsuup siunissaa pillugu isumalluarnerup pisariaqassusia innuttaasunit saqqummiunneqarpoq, taamalu sulisut taarseraateqisut uninngatinneqarsinnaanngussagaluarlutik.
Kommunalbestyrelsimut ilaasortat najuuttut (ilaasortanit 15-iusunit 9-it najupput) neriorsoqatigiipput Naalakkersuisunut saaffiginnissuteqarniarlutik ineriartortitsinermi suliassat politikkikkut isumaqatigiiffiusut pillugit kiisalu atorfeqarnikut toqqissimanissap pisariaqassusia eqqarsaatigalugu Narsarsuarmiunut tapersersuinerminnik ersersitsiumallutik.
Stine Egede oqarpoq: "Innuttaasunik ataatsimeeqateqarnerup isumaliutigilluakkanik imaqarnera assut iluarisimaarpara. Allannguutissat aggersut pillugit innuttaasut ilungersuasimanerat ilungersuanerallu paasilluarsinnaavara. Ineriartornerli iperarnaveersaartariaqarparput, piviusorsiussaagut suliassallu sukumiisumik pilersaarusiorlugit, taamaammat nuannaarutigaara Narsarsuup siunissaa pillugu suleqatigiissitanut Narsarsuarmiut suleqataajumammata. Oqallinnermut isumatusaarfiusumut qujanaq."