Narsami eqqaavissuarmi eqqakkanik elektroniskiusunik ingitserisarfiutigaluni toqqorsivik siorna februaarip 27-anni ikuallattup nappaqqinnissaa piareersarneqaleruttorpoq.
Illu ikuallanneraniit ukioq ataaseq qaangiutorlu sillimmasiisarfiup akiligaanik titartaasarfik MASANTI ingerlatsisoralugu neqeroortitsinikkut sanaartortussamik toqqaasoqarpoq, mannalu illu isaterneqareermat eqqakkanik ingutserisarfimmik nutaamik sanaartornissamut atortussat utaqqisaaginnalerput
- Nappaqqinnissaanut atortussat tikeriarpata juulip ingerlanerani sanaartorneq aallartisarneqassaaq, naatsorsuutigaarpulli ukiup uuma naannginnerani illup napparneqareersimanissaa, naammassinissaalu eqqaavissuarmi sulisunit erinigineqaqaaq, Narsami teknikkeqarfimmi driftsteknikkeri Steen-Ole Jensen oqarpoq.
Narsami eqqaavissuarmi inuit pingasut sulisorineqarput.