Asasakka Kommune Kujallermi innuttaasut tamassi
Inuiattut ullorsiornitsinni illoqarfittatsinni nunaqarfittatsinnilu sumiikkaluartusi tamassi qamanngavik pilluangaaritsi.
Siulitta qangaaniilli seqernup qullarnerpaaffia ullortunermik taallugu persuarsiutigisartagaat uagut nangillugu nalliussisarparput. Siulittami ukiup ilarujussuani piliarisimasaminnik nerersuaaqatigiillutik, kusanartunik atikkerlutik, qanigisatik nunaqqatitillu peqatigalugit ullortunermi nalliuttorsioqatigiittarput.
Kulturerput ataatsimoorluta ullumi nalliuttorsiutigissavarput, inuiattut ataqatigiinneq, suleqatigiinneq peqatigiilluarnerlu kulturikkut siulitsinnit pigeriigarput tammatsaaliortuartigu kinguaatinnut ingerlaqqittussanngorlugu.
Nunatta kujataa aasarissileruttorpoq, pinngortitarsuarput ukioq manna assut issilluni aputeqarsimaqisoq uisorernerinnartullusooq misinnartumik supineqartutut ililluni qaangiuppoq.
Nuna naallualeruttorpoq, kiatsinnera aasarisseruttorneralu tamanut atorluaqqunarpoq, avateeratsinniippummi immami, timaatungitsinnilu nunami piniagassavut ukiussamut peqqumaatissavut, pisuussutit annertungaartut periarfisalinni atorluarneqartaqaat.
Taamaakkaluartoq ilaqarpugut periarfissaqanngitsunik, taamaattumik eqqaamasartigit ilagut periarfissaqanngittut ikiortariaqartut tapersersoqatigiinnikkut nuannaarutissittartigit.
Ukiup taamaasinerani suut tamarmik oqilisimaartutut pilerfianni ilinniakkaminnik naammassinnillutik nasartaartut allagartartaartullu takussaalersarput. Taakkuppullu nunatsinni siunissami isumalluutigut ingiaqatigiumaagassagut, taamaammat ilinniakkassinnik naammassinnittusi angusassinnik pilluaritsi, ilinniaqqittussat ingerlalluarisi, qanortorlu siunissami amerlanerpaat nunatsinni iluaqutaallualerumaarisi.
Nunatsinni maanilu kujataani sulisut ilinniarsimasut tamaasa pisariaqartippagut, ilinniakkaminnillu allagartartaarlutik naammassinnittut Kommune Kujallermiit nuannaarutigeqaarput.
Kujataaniillu aallarlutik ilinniariarsimasortavut angerlakaanissaannik neriuuteqarpugut, ineriartortitseqqinnissamummi assanik amerlanerusunik suli pisariaqartitsivugut.
Angajoqqaanut kaammattuerusuppunga, naak amerlanerpaat meeqqamik pitsaanerpaamik ineriartornissaannik nukissaqarlutillu pingaartitsigaluartut, ilaqarpugut nukissaalatsitsinerup allatigulluunniit erloqinartorsiornerup nassatarisaanik, meeqqanut killilimmik nukissaqartunik. Nunaqqativut ilungersunartorsiorpata, allatigulluunniit tapersertariaqarpata piffissaatillugu qisuariartarisa, ilaatigut qisuariajaarneq meerannguamut annertuumik iluaqutaasinnaasarpoq.
Taamatuttaaq utoqqartavut ilaqarput kisimiittunngorsimasunik, aammalu ilaqarput kinguaaminnik nunaqqateqanngittut. Ilaqarpugut isumassuillaqqissunik, pajuttortunik, iluatissaassisunik allatigulluunniit utoqqarnut tapersersuiuartunik. Taakku qamanngavik qujaffigiumavakka.
Periarfissaq manna iluatsillugu timersoqatigiiffiit, peqatigiiffiit namminerlu kajumissutsiminnik suliaqarlutik illoqarfittatsinni nunaqarfittatsinnilu pikialaartitsillutik ataatsimoornernik pilersitsisartut qujaffigiumavakka. Ilissiuvusi tamatsinnut nuannaarnermik, angusaqarusussusermik susassareqatigiinnitsinnilu ukioq kaajallallugu pissarsiffigisartakkavut, soorlu ulloq manna aamma tamani aaqissueqataallusi pikialaaqataasusi assut nuannaarutigaara.
Nuna tamakkerlugu unammiuaarnerni Kommune Kujalleq sinnerlugu unammiaqattaarsimasut annertuumik qujaffigiumavakka. Pimoorussinersi tassuuna annertuumik akilerpoq. Taama oqariarlunga pinngitsoorusunngilanga suliffeqarfiit kommuunitsinniittut, allaallumi kommuunitta avataaniittut unammianut tapersersuisimasut qamanngavik qutsavigissallugit.
Covid-19 ukiuni kingullerni marlunni annertuumik aporfilersuisimavoq. Angallannikkut, niuernikkut, sanaartornikkut allatigullu eqquingaarnikuusoq maanna suut tamarmik pisarnermittut ingerlaqqilernerat isumalluarfigaara. Neriuppunga sulisinnaasut amerlanerpaartaat suliffinnut tunniusimallutik piumaartut. Inuussutissarsiortortatta tamassi pisariaqartippaasi.
Ulluinnavut atoqqileratsigit, sumi tamaani illarpalaaq, inuaqerpalaaq tusarsaaleqqittutut misinnartoq, qanortoq taamaattuaqqilerli.
Siunissarput eqqarsaatigalugu eqqarsaatissiissutigerusuppara ullumikkut atoqqinneqarsinnaasorpassuarnik eqqaavipput immertarpavut. Pequttat atoqqissinnaasut eqqaavissuarmi qaleriiaanut ilannguttarput, amerlasuut ikuallanneqartarput. Piffissanngunnginnerpa peqatigiilluta atoqqiisarneq inerisassallutigu? Taamaalilluta nunannguatsinnut mingutitsineq annikinnerpaamiitissinnaagatigut.
Nunarsuatta ilaani allani sorsuuttut ungasikkaluaqalutik uaguttaaq eqqorpaatigut. Sorsunnerup amiilaarnartuinik, navianartunik aseruingaarnernillu misigisaqanngikkaluarpugut. Nunarput eqqissisimaffiugaluartoq taamaattoq akit qaffakkiartornerisigut sorsunnerup kinguneri misigaavut - tamattalu pinngitsoornata misigilerumaarpavut. Neriuppunga peqatigiilluta ilungersunartut akiorumaarivut, nunalerinermi, aalisarnermi, inuussutissarsiutinilu allani akiugassarigutsigit, imaluunniit innuttaasutut nalinginnaasutut akiugassarigutsigit assigiimmik. Qularnaatsorlu aana: Kulturerput tassaavoq ataqatigiiffipput, suleqatigiinnitsinnik pilersisisoq, tassalu allanngutsaaliugassarput. Ullumilu tassa taamaaliorpugut!
Kommune Kujallermi innuttaasut, tikeraat kalaaleqativullu tamannguassi inuiattut ullorsiornitsinni eqqaammallusi pilluangaaritsi, ulloq qanigisasilu, naak ilavut maqaasisaqaraluartut, nuannersumik persuarsiortumillu atorluarisiuk.
Kingumut qaammanertuseqqippugut, pinngortitamilu kusanangaartumi nunap najukkatta avatangiiserititai pinningaarlutik sikkeraleruttorneranni Jakob II Egedep taalliaasa ilaanni oqaatit atugai issuaavigalugit naggasiutigissavakka:
”Ila qujanartoq nunannguami
Kalaallip Kiap malugissanngilaa
inuugatta maani siooranata
pikittorsuit ungataani”.
Qujanaq.