Asasakka ilinniarnertuunngorlutik naammassisut
Tamassa ilinniarnertuut assuffallutik oqilisimaartut, tamassa natsat qaqqorivissut, tamassalu ilaquttat ikinngutillu qungujulaartut qiimasullu, tamaaniippullu ilinniartitsisut tulluusimaarlutik persuarsioqataasut.
Asasakka ilinniarnertuunngortut, allagartartaarnissinni qamanngavik pilluangaaritsi.
Illoqarfitsinni aasaleruttorfiata ilisiarnaatigisartagaasa ilagaat ilinniartorpassuit ilinniakkaminnik naammassinnillutik takussaalertarnerat. Kiinnat nuannaartut tulluusimaartullu takullugit sunnertinnanngitsoornarneq ajorpoq, soorlu ullumikkut aamma amerlasuujulluta misigisugut.
Ullumikkummi ulloq persuarsiornartuuvoq, ilinniagaqaqqinnissamummi matuersaat matorpassuarnut ammaasisuusinnaasoq, ukiuni kingullerni ilungersornertalimmik sulereerlusi, maanna uppernarsaat pigilersimallugu maaniippusi. Allagartaq pigiligarsi neriuppunga ukiuni aggersuni atorluarlugu matuersaatigilluassagissi. Nunatta ilinniarsimasut tamaasa pisariaqartippai. Tamatta qaffasinnerpaamik ilinniagaqarnavianngilagut, taamaattorli ilinniarsimasuugaani aamma periarfissat amerlanerit ammarartarput.
Qularnanngilaq ilinniarnissi ingerlanerani nuannersut oqimaannerusullu aqqutigisarsimassagisi, ilaatigut ulluni oqimaanerusuni tunniutiinnangajannernik misigiffiusut, imminullu piumaffiginermik annertuumik peqarlusi ilinniagarsi ineriartorfigisimasarsi naammassivarsi.
Asannitsisi tapersersuisullu anguniagaqarnerup aqqutaani nukitut tasiortigisimasat qujanartaqaat, taamaattumik ilaqutaasut, aappaasut, ikinngutaasullu tapersersuisimanissinnut qutsavigiumavassi.
Ilinniakkassinnik naammassinnillusi allagartartaartusi Kommune Kujallermiit nuannaarutigeqaassi. Ilissilu kujataaniit aallarlusi ilinniaqqittussanngortusi neriuuteqarpunga ilinniaqqereerlusi naammassigussi angerlakaajumaartusi, ineriartortitseqqinnissamummi sanaartornernilu annertuuni sulisut ilinniarsimasut kujataani pisariaqartippavut.
Eqqaamallugu angorusutaq sunaluunniit anguneqarsinnaammat, ilissilu nammineerlusi piumassusersi apeqqutaaginnarumaarpoq.
Qanortoq ullorsi persuarsiornartuullunilu puujunaatsuugili, siunissamilu angusaqarluarnissassinnik kissaallusi pilluaqqoqqippassi.