Qaqortumi utoqqaat peqatigiiffianni ilaasortat ataasinngornermi maajip 16-ianni ullaakkorsioqatigeereernerup kingorna eqqakkanik katersipput.
-Timimik aalatitsinissaq siunertaralugu utoqqaat peqatigiiffiata illup ornittakkatta silataani eqqakkanik katersinissaq siunniussimavarput. Ilaasortat peqataasut nuannisarlutik katerseqataanerat takullugu nuanneqaaq, timimimmi aalatitsiniarluni eqqagassanik katersineq illup silataanut takujuminarsititseqaaq, Utoqqaat peqatigiiffianni siulittaasoq Therkild Kleist oqarpoq.
Storesøvej B-601-p eqqaa eqqagakkunik teqqaasimasunik cigaretsillu kimmivikuinik katersiffioreernermi kingorna takujuminarseqaaq, sumiiffiillu amerlanerusut eqqakkanik katersiffiusinnaalluartut Utoqqaat peqatigiiffiata siulittaasua isumaqarpoq.
-Utoqqaat timimik aalatitsiniarnermik aallaaveqartumik eqqakkanik katersinerat neriuppunga aamma allanut maligassiuilluarumaartoq. Ikioqatigiillutami illoqarfitsinni eqqakkanik katersigutta illoqarfinnguarput aasarisseruttornerani saligaatsuussaaq, Therkild Kleist kaammatuuteqarluni naggasiivoq.