Asasakka ataqqinartut sulisartut, ullorsiornissinni pilluangaaritsi.
Kommunitta illoqarfiini nunaqarfittaanilu sumiikkaluarussiluunniit tassaavusi kommuunitsinni nunatsinnullu napatitsisuusut.
Meerartatsinniit utoqqartatsinnut paaqqutarinninneq, suliffippassuillu ulluinnarni inuuniarnitsinni assakkaasunik ingerlatitsisuusut tunniusimangaarlusi ingerlatsiffigalugit sullisseqataaffigisasi ataqqinaatigaasi; sulinersimi inuiaqatigiinnut tamanut tunissutaavoq tamanit pinngitsoorneqarsinnaanngitsoq.
Sulinissigut inuiaqatigiinni nammaqatigiinneq tunissutigisartagarsi annertungaaraluartoq ilisimaarivara sulisartorpassuit akornanni akissarsiaqarnikkut, inuuniarnermilu akissaateqarniarnikkut inissisimaneq ilungersunartumik inissisimasinnaasartoq.
Kommunalbestyrelsimiit inuiaqatigiit naligiinnerusumik atugaqarnissaat anersaaralugu suliniuteqarnerput, siunissami sulisartunut atugassarititaasut oqinnerulernerannik malitseqarumaarnera neriuutigaara. Naalakkersuinikkummi suliaqartunut qanimut suleqateqarnikkut suliffissanik ataavartunik pilersitsiuarnissaq kujataata ineriartoqqinnissaanut aqqutissiuusseqataaffigissavarput.
Kommunitsinni suliffissat pioreersut saniatigut suliffissanik nutaanik pilersitsiniarneq ukiuni arlaqartuni uninngasuusisimasoq ulluni makkunani assiliaq allanngoriartorpoq.
Qaqortumimi mittarfiliornissamut atatillugu piareersarneq aallartereerpoq, atorfiit arlaqartut maannakkut Majoriaq aqqutigalugu nittarsaanneqarput. Sulinerup aallartinnerani kommunitsinni suliffissaaleqisut ullumikkut 250-nik ikinnerunngitsut ikilinissaanik malitseqarumaartoq qularinngilara.
Mittarfittaarutta inuit kommunitsinni amerlinissaat naatsorsuutigissavarput; suliffissat amerlanerulernerata nassatarissavai sulisartut amerlanerulernerat aamma meeqqat inuusuttuaqqallu amerlanerit.
Taamaattumik inuusuttortatta ilinniarnissartik qanorlu inuunermi anguniagaqarnissamik siunnerfeqarnissamillu pilersaarusiornissaannut maanna periarfissaalluarpoq.
Suliffissaaleqinerup annikinnerpaamiinnissaa siunnerfigalugu apriilip 21-anni inuussutissarsiutinik ingerlataqartunit suliffeqarfinniillu peqataaffigineqartumik kommunimiit isumasioqatigiisitsivugut.
Suliffissaaleqisut pillugit sulinerup nukittorsarneqarnissaanut pitsanngorsarneqarnissaanullu peqataasut amerlaqisunik siunnersuutissaqarput.
Matumani inuusuttut 18-niniik 25-it tikillugit ukiullit immikkut sammineqarnerulernissaat, sulinermut piginnaanngorsaqqitanik suliffeqarfinni tigusisarneq nukittorsarniarlugu suliffeqarfinni ilitsersuisussanik aqqutissiuisunillu pikkorissaasoqartalernissaa aamma maligassiuisunik atorluaanissaq eqqartorneqartut ilagaat.
Isumasioqatigiinneq kommunip suliffissaqartitsiniarnermi iliuusissatut pilersaarusiornissaanut immersoqatigiiffiusoq, ukiamut malitseqartinneqaqqiilluni naapeqatigiiffioqqissaaaq.
Ineriartornerummi nassatarisaanik suliffissat amerlisarneqartuarnerisigut inuiaqatigiinni nammaqatigiinneq atugassarititaasut pitsaanerulernerannik nassataqartussaammat innuttaasut qinikkallu qanimut suleqatigiinnermikkut kivitseqatigiittariaqarput.
Ukiut makku kujataata ineriartoqqilernerani suliffinni pioreersuni pilersinneqartussanilu sulisartuususi qitiulluinnartuuvusi. Periarfissarlu manna iluatsillugu tunniusimangaarlusi sulinersi pillugu qamanngavik qutsavigerusuppassi.
Pinngitsoorusunngilangalu utoqqartagut soraarninngorsimasut ukiorpassuarni sulinermikkut maligassiuilluarsimasut, annertuumillu inuiaqatigiit nammaqatigiinnissaannut tunissutigisimasaannut qutsavigissallugit. Qanortoq kinguaassinnik isumagineqarluarisi.
Ataqqinartut sulisartut, aamma angajoqqaajusut. Qujanaq atugassarititaasut oqitsuinnaajuaannanngikkaluartut immissinnut meeqqallu pilersorsinnaajumallugit suliuarnissinnut.
Suliffiit tamarmik naleqarput, ilinniarsimasuugutta ilinniarsimasuunngikkuttaluunniit sulinitsigut tamatta tunniussassaqarpugut. Taamaattumik angajoqqaat meeqqaminnut sulinerup qanoq pingaaruteqassusianik perorsaanermi ersersitsiuarnissaannik, meerartattalu siunissami ilinniagaqarlernissaannut aqutsissiuisarumaarnerannik kaammattorusuppakka.
Meerartagummi inuusuttagullu taakkuupput siunissami uagutsinnut pilersuilertussat.
Sulisartut ataqqinartut, ullorsiornissinni pilluaqqoqqillusi siunissami sulinikkut tamanillu angusaqarluarnissassinnik kissaappassi, ullorsiorluarisi.
Kommune Kujallermi borgmesteri
Stine Egede