Ukiuni kingullerni nunatta kujataani pinerlunniartarneq ajoraluartumik annertusiartorpoq. Inuusuttut tillinniartarnerat, aserorterisarnerat, tillittarnerat ilaatigullu annersaasarnerat qaffakkaluttuinnarsimavoq.
Taamaattumik Kommune Kujalleq aamma Kalaallit Nunaanni Politiit ataatsimoorussaminnik suliniuteqarnermikkut pinaveersaartitsinermik ingerlataqassapput, suleqatigiinnerminnilu nunatta kujataani meeqqat inuusuttuaqqallu pinerluttarnerannik ajornartorsiuteqarnerminni imminnut pisussaaffeqatigiillutik pinaveersaartitsissapput.
Taamatut suleqatigiinneq ajuusaarnaraluartumik tunngaveqaraluartoq ataatsimoorussilluni suliaqartoqarnissaa Kommune Kujallermi borgmesterip nuannaarutigaa.
- Meeqqat inuusuttuaqqallu pinerlunniartalertarnerat takusinnaallugu assorsuaq alianarpoq. Meeqqat inuusuttullu pillugit, innuttaasut inuiaqatigiillu pillugit kommunitut politiitullu taamatut pisoqarnera allanngortinniassallutigu akisussaaffigaarput, akisussaaffillu taanna tiguarput, Stine Egede oqarpoq nangillunilu.
- Oqartussatut tamatta immikkoorluta suliaqarsinnaaqaagut, ataatsimoorlutali suliaqarutta angusaqarluarsinnaaneruvugut. Taamaattumik pinerlunniartarnerup annertusiartornera pinaveersaartinniarlutigu immitsinnut taamatut pisussaaffilernerput nuannaarutigaara, neriuppungalu tamanna aamma innuttaasut ilassilluarumaaraat.
Sumiiffinni inuiaqatigiit pingaarutilimmik inissisimapput
Suleqatigiinnissamik isumaqatigiissuteqarneq suliffeqarfiit suleqatigiinnissaat taamaallaat pineqanngilaq - aammali sumiffinni siunnersuisooqatigiit pinaveersaartitsinermik suliaqarnissaasa siullersarissavaat.
Suliniaqataasuussapput Qaqortumi nunap immikkoortuani politikommissær kiisalu Kommune Kujallermi kommunaldirektøri, inunnik isumaginnittoqarfimmi pisortaq atuarfeqarfimmut ingerlatsinermi pisortaq, ulluunerani paaqqinnittarfiit, kultureqarnermi sunngiffeqarnermi sulisut suliffissaqartitsiniartullu.
Taamatut suleqatigiinnissami pitsaanerpaamik paasisimasaqarnissaq inuusuttullu pinerlunniartarnerat sumiiffinni innuttaasut qanoq misigineraat qanorlu suliarisarneraat paasisaqarfiginerujumallugu sumiiffinni siunnersuisooqatigiinni ilaasortat peqatigalugit borgmesteri Stine Egede nunatta kujataani angalanikuupput.
Sumiiffinni meeqqanik inuusuttunillu inuit ikiuukkumalluinnartut angalanermi naapinneqarput. Napitaasa ilagaat pisortani namminerlu suliffeqarfiutilinni sulisut, timersoqatigiinni nammineq kajumissutsiminnik sulisut kiisalu inuit meeqqat inuusuttuaqqallu akornanni pinaveersaartitsinermik namminneq suliniuteqartut naapinneqarput.
Nunatsinni politimester, Bjørn Bay, naapertorlugu taamatut suliniarnerup iluatsittumik pinissaani sumiiffinni nukiit atorneqarsinnaasut oqartussallu suleqatigiinnissaat pingaartorujussuuvoq.
- Sumiiffinni najugaqartut aalajaallutik piuinnarsinnaasumillu suliaqarsinnaanerat kiisalu piffisap ingerlanerani suliaqaannarsinnaanerat sumiiffinni meeqqanut inuusuttuaqqanullu pingaaruteqartorujussuuvoq - aamma ajornartorsiut aaqqiivigineqarsorinaraluaraangalluunniit. Taamaattumik sumiiffinni inuiaqatigiit pingaaruteqarluinnartumik akisussaaffeqarnissaat aalajangiisuulluinnartarpoq, Bjørn Bay oqarpoq nangillunilu.
- Politiitut kommunitullu toqqissisimatitsinissamik kisitta pilersitsisinnaanngilagut - aatsaat inuiaqatigiit peqatigalutigit tamanna angusinnaavarput. Taamaattumik nunatsinni tamarmi sumiiffinni siunnersuisooqatigiit tamarmik taamatut sulinialinnginnerini atorsinnaasatsinnik suliniutitta angusaqarfiulluarnissaa misilittagaqarfigilissagippullu kissaatigaarput.
Taamatut suliniuteqarneq 2022-p ukiaanerani aallartinniarneqarpoq.