Kommune Kujallermi meeqqerivinni aqutsisunut siusinaartumik pilertortumillu iliuuseqarnissamik pikkorissarneqarneq meeqqanut eqqummaarinninnerulermik malitseqassaaq.
Ilinniartitaanermut Aqutsisoqarfik Qallunaat Nunaat peqatigalugu meeqqanik sullissisut piginnaanngorsarneqassapput, suliniutit 16-iupput, meeqqanulli suli atualinngitsunut suliniut 3 sammitinneqarluni.
-Meeqqanik ukioqanngitsuniit arfinillit tikillugit ukiulinnut illoqarfittatsinni nunaqarfittatsinnilu sullissisut pikkorissartinneqarput, matumani meeqqap inuttut atugarisai aallaavigalugit alapernaannerulernissaq meeqqallu pisariaqartitai aallaavigalugit siusinaartumik iliuuseqartarnissaq siunertaallutik, Kommune Kujallermi Perorsaanermut siunnersorti Malene Høegh-Olsen oqarpoq.
Meeqqat ilaat meeqqerivimmeereerlutik atualeraangamik immikkut pisariaqartitsinerat maluginiarneqalertarpoq, tamannali meeqqerivimmi siusinaartumik pilertortumillu iliuuseqartalernermi malugiginiarneqartalissaaq.
-Meeqqat tamarmik assigiinngitsunik ilikkartariaaseqarput, pisariaqartitaallu tamarmik assigiinnatik. Meeqqerivinni tamani meeqqat mappitaartinneqarput, taamaalillutik ineriartorneranni malinnaavigineqarsinnaanngorlutik. Taamaaliornitsigut meeqqat inuttut atugaat aallaavigalugit immikkut pisariaqartitaat qanimut malinnaavigineqarsinnaanngussapput, Malene Høegh-Olsen oqarpoq.
Ilinniartitaanermut Aqutsisoqarfimmiit inuit arfinillit meeqqerivinni aqutsisunut piginnaanngorsaapput, kingorna malitseqartumik piginnaanngorsaajartoqqissallutik. Suliniut 3 2021 – 2023 ilanngullugu meeqqerivinni sulisunik piginnaanngorsaaneq ingerlatissavaat.