Hans Peter Hansen Innovation South Greenlandimi siulittaasuattut inuttut atukkaminik pissuteqartumik tunuarpoq, kingoraartigaalu Steffen Lund, Sjællandip avannaani Inuussutissasiutinut Ilinniarnertuutullu Ilinniarfimmi ulluinnarni pisortaasoq.
- Steffen Lundip toqqarneqarnera iluarilluinnarpara, angut misilittagalik Innovation South Greenland A/S-ip siulersuisuinut ilannguppoq. Steffen Lundimi VUC Roskildemi siulersuisuni siulittaasuuvoq kiisalu FGU Nordvestsjællandimi siulersuisunut ilaasortaalluni, borgmester Stine Egede oqarpoq.
Innovation South Greenland A/S Oktober 2019-mi kujataani inuussutissarsiutinik ineriartortitseqatigiiffittut pilersinneqarpoq, Kujataani ineriartornermik ukiorpassuarni aporfeqarsimaqisimaqisumik siumut aallartitsinissaq siunertaralugu.
-Pissutsit illuanut saatsinneqassappata nukiit annertuut pisariaqartippavut, tamannalumiuna pillugu Steffen Lund pissarsiariniarsimagipput. Inuussutissarsiortut qinikkallu akornanni nukilinnik peqarluareerpugut, sulialli aalajaatsumik suliarisariaqarput. Steffen Lundip Campus Kujallermi pisortaasimanera ajoqutaanngilaq, Kujataa najorsimagamiuk ilisimasaqarfigaa, uagullu inuttut pikkorissutut piginnaasalittullu ilisimavarput, Stine Egede oqarpoq.
Innovation South Greenlandip atuunnerani ukiuni siullerni marlunni Kommunalbestyrelsip Innovation South Greenlandimut aalluteqqullugit noqqaassutigisaatut inuussutissarsiutit pingaarnerit sisamat ineriartortinneqalernissaat sammineqarsimavoq.
-Inuussutissarsiutit taakku tassaapput Takornariartitsineq, Inuussutissalerineq, Aalisarneq kiisalu Aatsitassarsiorneq. Tamatumalu saniatigut Kujataa ilinniartoqarfittut nukittorsagassaraarput, matumanilu Steffen Lund siulersuisuni assut nukitoqutaassaaq. Kommune Kujallermi ineriartortitsisoqassappat tikinneqarsinnaassuseq pingaaruteqarluinnarpoq, mittarfiliornerullu ukioq manna aallartittussaanera inuussutissarsiutinik ineriartortitsinermut assut pingaaruteqarpoq. Siunissamut isumalluarpugut Steffen Lundillu suleqatiginissaa qilanaaraarput, Stine Egede naggasiivoq.