Kommune Kujallermi nipisat suaat 139 tonsit pisassiissutigineqaraluartut pisassiissutaasunit 30 pct.-ii kisimik tuninineqarsinnaanerat borgmesterimit naammagineqanngilaq.
Kommuni Kujallermi nipisat suaat 139 tonsit pisassiissutaasut Royal Greenlandimut 25 tonsit kiisalu Artic Prime Fisheriesimut 20 tonsit missaat aalisartunit tunineqarsinnaanissaat aaliangiusimaneqarpoq. Tamanna kujataani aalisartunik naammagineqarnani oqariartuutigineqartoq kujallermi borgmesterimit taperserneqarpoq.
-Aalisartut tunisinnaasamik ikippallaarnerat tunngavigalugu naammagittaalliuuteqarlutik susassaqartunut qisuariarnerat paasisinnaavara taperserlugillu. Aalisarnermummi isumalioqatigiisitap kisitisaatai qiviaraanni takuneqarsinnaavoq kujataani aalisarneq nunatta sinneranut sanilliulluni annertugisassassaanngitsoq. Taamaattumik kujataani aalisartut nipisat suaannik tunisinnaasaasa killeqarnerujussui paasiuminaappoq inissaminiinnanilu, Stine Egede oqarpoq.
Kujataani aalisartut naammagittaalliuuteqarlutik Royal Greenlandimut, Artic Prime Fisheriesimut, KNAPK-mut kiisalu Naalakkersusisunut saaffiginnissuteqarput.
-Kujataani aalisartut nipisisat suaannik tunisisarnertik annermik isaatitsissutigisarpaat, neriuppungalu pisassiissutigineqartunut naleqqunnerusunik tunisisinnaanissamik periarfissinneqarumaartut, Stine Egede oqarpoq.