Borgmester Stine Egede sapaatit akunnerini kingullerni marlussuni Narsami, Nanortalimmi Qaqortumi soqutigisaqaqatigiinnik innuttaasunillu ataatsimeeqateqartarpoq.
Aaqqissuusaanermik allannguinerup kommunillu aningaasaqarnerata killiffiinik paasissutissiinissaq innuttaasullu apeqqutaannut tusarnaarnissaq ataatsimiinnerni siunertarineqarput.
Sumiiffinni tamani inissianik pisariaqartitsineq eqqaaneqartarpoq, pingaartumik utoqqarnut inissiat inissiallu minnerusut pisariaqartinneqarnerat eqqaaneqartarluni. Inissiarpassuit ullumikkut inoqanngillat kisermaanut, utoqqarnut inoqutigiinnullu ikinnerusunut angivallaarnertik akisuallaarnertillu pissutigalugu. Tamatuma saniatigut kommunip inissiaatai amerlasuut pilersaarutaagaluartut naapertorlugit aserfallatsaalineqarsimanngillat.
-Kommunitsinni utoqqarnut inissianik pisariaqartitsineq annertoqaaq. INI A/S suleqatigalugu utoqqarnut inissianik inissianillu minnerusunik pisariaqartitsineq qulaajassavarput taamaalilluta ukiuni tulliuttuni qanoq aningaasaliisarnissarput pilersaarusiorsinnaalerumallugu, Stine Egede oqarpoq nangillunilu.
-Suleqatigiinnerput pitsanngorsarumallugu INI A/S-ip aqutsisuinik qaammatikkaartumik ataatsimeeqateqartalerpugut. Inissiaatitsinnik aserfallatsaaliinissaq pingaruteqaqaaq, piffissaatillugumi aserfallatsaaliinngikkutta akisuneruinnalissapput, aamma innuttaasunut. Inissianik nutarterinermut aningaasat atorneqartussat amerlanerulersikkumallugit kommunalbestyrelsip tullissaanik ataatsimiinneranut ukiunut tulliuttunut tallimanut inissiaqarnikkut pilersaarummik saqqummiussissaanga.
Ineqarnermut tunngasut saniatigut sulisussaaleqineq sulisunillu sulisitsiinnarniarneq eqqartorneqartarput, pingaartumik paarsiviit atuarfiillu eqqarsaatigalugit.
-Kommunip suliffeqarnikkut periusia pillugit isummanik tusarumalluta qanittukkut isumasioqatigiisitsissaagut Majoriaqarfiit peqatigalugit. Amerlanerusut sulilersittariaqarpavut, sulinerlu akilersinnaasariaqarpoq. Tamatuma saniatigut ilinniartitsisunik amerlanerusunik soorlu Nanortalimmi, pissarsiniartariaqarpugut Stine Egede oqarpoq.
Talittarfiit puttasullu sumiiffinni tamani aalisartut takornariartitsisullu akornanni ajornartorsiutaapput.
-Illoqarfinni nunaqarfinnilu talittarfiit immikkut samminiarpakka. Kujataani inuussutissarsiornikkut periarfissat iluaqutigisinnaajumallugit atortussat pisariaqavissut piginngikkutsigit attaveqaatit ineriartortinneqarsinnaanngillat.
Illoqarfinni pingasuni tamani meeqqanut inuusuttuaqqanullu sunngiffimmi sammisassaat pitsaanerusut kissaatigineqartarput.
-Kommunitsinni meeqqat inuusuttuaqqallu peqqinnartunik sunngiffimmi sammisassaqartinneqarnissaat pingaaruteqarpoq. Meeqqat inuusuttuaqqallu timiminnik atuinissaannut periarfissiortariaqarpavut peqqinnartunik ataatsimoorfissat piviusunngortissinnaajumallugit, tamakkumi tamatigut qanorluunniit utoqqaassusillit atugarinnerulernissaannut peqqinnerulernissaannullu aqqutaassammata, Stine Egede naggasiivoq.