Kommune Kujallermi allaffissornermi aaqqissuussaaneq nutaaq atuutilertoq ikaarsaarfigineqartorlu borgmester Stine Egedep nuannaarutigaa.
Kommune Kujallermi ingerlatsiviit arfiniliusut apriilip aallaqqaataa aallarnerfigalugu sisamaannanngorput. Tamanna kommunalbestyrelsip inuttaasunik sullissinerup pitsaanerulernissaanik aamma ingerlatsiviit immikkoortortallu akornanni suleqatigiinnerup pitsaanerulernissaa siunertaralugu allannguiniarnerannik aallaaveqarpoq. Minnerunngitsumik Narsami, Nanortalimmi Nunaqarfinnilu sullinneqarnerup pilertornerulernissaanik ilaatigut siunertaqartoq.
-Kommune Kujallermi innuttaassut qangali oqariartuutigisarpaat kommunimiit sullissineq pitsaanerusariaqartoq, tamannarpiarlu allanngortinniarlugu kommunalbestyrelsimi allaffissornikkut aaqqiissuussaanerup allanngornissaanik suliniuteqarpugut. Kommuunerujussuanngornerup kingorna Qaqortumut tamanik katersuisimaneq pitsaanerpaangittoq nassuerutigaarput. Maanna oqarsinnaanngorpugut allannguinermut ikaarsaarluta, angusarput annertooq nuannaarutigaara, borgmester Stine Egede oqarpoq.
Kommunimi allaffissornikkut aaqqissugaanerup aprilip aallaqqaataani atuutilernissaa kommunalbestyrelsip marsip 23-anni ataatsimiinnermini akuersissutigaa, siunertarineqartorlu siunissami aggersumi innuttaasunik malugineqalerumaartoq borgmester Stine Egedep qularutiginngilaa. Aaqqissuusaanerup nutaap inissivinnissaa majip naanerani piareersimassaaq. Allattoqarfinni nutsernerit pisussaammata.
-Aaqqissuussaaneq nutaaq ullumikkuminngaanniit atuutilerpoq, tamanna siunissami aggersumi eqaannerusumik pitsaanerusumillu sullissilernermik nassataqartussaq innuttaasunik malugusuutigineqalerumaartoq qularinngilara, allannguinitsinnimi tamanna siunertaavoq, Stine Egede oqarpoq.
Ingerlatsiviit sisamaannanngortut tassaapput Aningaasaqarnermut Inuussutissarsiornermillu Ingerlatsivik, Teknikkimut Avatangiisinullu Ingerlatsivik, Isumaginnittoqarfik Pitsaaliuinerlu, kiisalu Paaqqinnittarfinnik, Ilinniartitaanermik, Suliffeqarnermik, Kulturimik Sunngiffimmillu Ingerlatsivik.
Ingerlatsiviit sisamaasut atissaannik unammisitsineq maanna ingerlavoq, kommuunip quppersagaani peqataaniaraani paasissutissat nassaarineqarsinnaapput. Narsami Nanortalimmilu paasissutissiinerit ingerlanneqareerput sapaatip akunnerata tullianilu Qaqortumi Innuttaasunik ataatimiisitsinikkut nanginneqassallutik.
Upernaakkut 2023 allannguinermi nalilersuineq ingerlanneqarumaarpoq.