Arnaq inoqatiminut qanilaartoq, tamanut inissaqartitsisoq, Nanortalimmi nunatsinnilu inuttaasunut politikkikkut sullissisimasoq akornatsinniikkunnaarpoq.
Kristine Raahauge 1947-mi inunngortoq, Nanortallip atuarfiani fuldmægtitut aamma Nanortalimmi Katersugaasiviup pisortaatut sulisimavoq.
Nanortalimmi 1993-97 borgmesteriunermi kingorna 2007-imi kommunerujussuarnut ikaarsaarnisap tungaanut borgmesteriusimavoq, Inatsisartunilu aamma ilaasortaasimalluni.
Kristine arnaavoq Nanortalimmut uummateqarluartoq, ineriartortitsinissamik siunnerfeqarluni anguniagaqartarsimasoq.
Uteriitsuunera ilisarnaataanut ilaalluinnarpoq, taamaakkaluarlunili allat isumaannik inissaqartitsilluarluni peqataatitsisarnini aamma ilisarnaatigivaa.
Nanortallip Katersugaasiviani sulinermini Nanortallip eqqaani kulturikkut eriagisariaqartunik nalunaarsuinermik annertuumik suleqataasimavoq.
Kristinep katersugaasivimmi pisortaanermini sulilluarsimanera qutsavissaraarput, matumanimi ilaatigut nunatta avataaniit annertuunik angerlaassuisimavoq, assitoqqanillu annertoorujussuarnik katersugaasivik aamma pigisaqalersissimallugu.
Kristine misilittakkaminik ilisimasaminillu inoqatiminut ingerlatitseqqikkusuttuuvoq, tamannami soraarninngoreeraluarluni saaffigineqartilluni piffissamik atuinermigut killissani tikillugu takutittuartarpaa.
Kristine Nanortalimmi Katersugaasiviup pisortaatut sulinermini, Nationalmuseumiminngaanneersunik marlunnik suleqateqarluni kallaallit qallunaallu suleqatigiinnerannik, oqaluttuassartaannik kiisalu
illukusiornermik imaqartumik atuakkioqataavoq.
Atuagaq atuakkioqataaffigisani ”Kap Farvelip eqqaani kulturikkut naapinneq” Kulturministeriap Ilisimatusarneq pillugu ataatsimiititaliaata Julius Bomholt Prisenip nersornaasiuttagaanik 2012-mi nersornaatisissutigaa.
Kristinep soraarninngornermi kingorna Danmarkimi Samsømi angerlarsimaffigilikkamini toqukkut qimagunnerani annaasaq annertoqaaq.
Kristinep uia, meerai, qatanngutaalu annaasaqarneranni Kommune Kujallermiit misiginneqatigingaarpagut.
Kristine Raahaugep eqqaaneqarnera ataqqinartuuli.