Kristine Markussen ”Kristi” marriortutut kusanartunillu eqqumiitsuliortutut ilisarisimaneqarluartoq 62-inik ukioqarluni akornatsinniikkunnaarpoq.
Kristi 1959-imi Narsami inunngortoq meeraanerminiit assassornermik soqutigisaqarpoq, efterskolernerminilu Sønderborgimi Håndværkerskolimi atuarnermini marrerinermik soqutigisaqalerpoq, nuannareqigamiullu kingorna marriortutut marrarnillu sanasutut ukiuni sisamani ilinniarpoq.
Marriortutut 1981-imi naammassinermi kingorna nunatsinni, Sverigimi, Danmarkimilu namminersortutut sulivoq. Suliaani kusanartuni kalaaliunera ilisarnaataavoq,marriaanimi nunatta naasui, uumasui, inuit, piniutit kalaalerpaluttullu allat takussaasarput.
Suliai kusanartut ilisarisimaneqarluartullu piumaneqarluartuupput, Narsamilu sannaveqarnermi nalaani aamma kunngikkormiut Narsami tikeraarnerannut atatillugu pulaarneqarsimavoq.
Kristi nunatsinni, Savalimmiuni, Danmarkimi, Sverigemilu kulturikkut illorsuarni katersugaasivinnilu arlaleriarluni suliaminik saqqummersitsisarpoq. Ilisarisimaneqarluarnermigullu nunarput pillugu nittarsaassilluartarluni.
Kristi arnaavoq sunilluunniit unammillernartunut qunugisaqanngitsoq, aalajangiussaqaraangamilu aalajangersimalluni anguniagaqartartoq, suliaqarnermigut kusanarnerpaamik takutitserusuttoq.
Kristip arnap eqqissisimasup, inussiarnersup, inoqatiminullu asanninneqangaartup siusippallaamik qimagunnerani nunatsinni eqqumiitsuliornerup kulturillu silarsuaani annaasaq annertoqaaq.
Kristip uia erneralu, qatanngutaalu annaasaqarneranni Kommune Kujallermiit misiginneqatigingaarpagut,
Kristine Markussenip eqqaaneqarnera ataqqinartuuli.