Nunatsinni arnat naligiisitaanermut tunngatillugu inissisimalluarput. Ukiut 45-t matuma siorna, tassa 1977-imi Arnat ulluat malunnartinniarneqartalermalli pissutsit allanngorsimaqaat.
Ullumikkummi arnat amerlasuut siuttutut inissisimalersimapput. Kommunitsinnimi kommunalbestyrelsimi ilaasortat affaat sinnerlugit arnaapput. Ilimmarfimmi qaffasissumik ilinniagaqartut amerlanersaat arnaasarput, ilinniarfinnilu ingerlariaqqiffiusuni arnarpassuit takusarpagut.
Nunani siuarsimasuni arnat amerlasuutigut siuariarsimagaluaqisut, taamaattoq nunarsuup ilaani annertuumik arnanut naqisimanninneq uagutsinnut paasiuminaassinnaaqisoq atugaavoq. Oqanngilanga nunatsinni atugaanngilluinnartoq, angerlarsimaffiimmi ilaanni ajoraluartumik suli arnanut naqisimanninneq, timikkut tarnikkullu persuttaaneq, kinguaassiutitigullu kanngutsaatsuliornerit annertuumik atugaapput.
Inuiaqatigiinni tamatta ataatsimoorluta arnanut timikkut tarnikkullu persuttaanerit, kinguaassiutitigullu innarliisarnerit taamaattussaannartut isiginagit, taama atugaqartunut assatsinnik ikiuerusuttunik isaassisarnissarput pingaaruteqarpoq. Arnammi pissutsinik qulaani taariikkannik atugaqartut ikiortissarsiornissaminnut alloriaqqinnissaminnullu tunuarsimaarsinnaasarput.
Kommune Kujallermi kommunalbestyrelsimi annertuumik kinguaassiutitigut atornerluisarnerup annikilliartortinnissaanik pimoorussamik sulineq qitiutillugu siunnerfeqarluta suliniuteqarpugut.
Arnat ulluanni angutitavut amerlanerpaat qutsavigiumavakka, arnartaminnut meerartaminnullu annertuumik ulluinnarni tapersersuilluartut. Meeqqaminnut maligassiuilluartut, perorsaalluartullu.
Angerlarsimaffimmi naligiimmik inuuffiusoq aamma meeqqanik nukittuunik, nammineersinnaalluartunillu pilersitsiviusarpoq. Meeqqallu nammineerlutik aamma assinganik angajoqqaanngorumaarput, ataataalluarlutik anaanaalluarlutillu.
Qanortoq ilaqutariit periarfissasi aallaavigalugit arnat ulluat nuannersumik atorluarisiuk.
Ulluni makkunani Ukrainimi innuttaasut eqqarsaatinni initungaartut ullumi aamma eqqamavakka. Arnarpassuimmi Ukrainimiit qimarrapput, meerannguatik kisiisa ilagalugit, angutitatik qimallugit, nalullugu takoqqissanerlugit. Nunarsuarmi inuit ataasiakkaat pissaaneqarniarneranni ilaatigut arnarpassuit uillarninngortinneqartarput. Qanortoq pissaaneqarniaq piaartumik unitsinneqarli.
Arnat, nunarsuaq tamakkerlugu arnat ulluanni ullorsiorluarisi.