Qaqortumi illoqarfiup bussia Europami maleruaqqusat nutaat atuuttut malillugit sananeqarsimasuupput, taamaalilluni bussi nunatsinnut tulluarsagaanngitsumik atortorissaaruteqarluni suliarineqartariaqartarpoq.
Qaqortumi bussi Dieselimik motoritortut nutaaliaanerit ilaanik sanaajusoq ajoqquteqarluni angalajunnaarallartoq arlaleriarluni saqqummiunneqartartoq bussinik atuisut maluginiarsimassavaat, tamannali atortorissaarutinik nunatsinnut tulluarsagaanngitsunik atuinermik aallaaveqarpoq.
- Bussi Europami maleruaqqusat nutaat atuuttut malillugit sananeqarnikuupput, taamaattumik atortutigut Kalaallit Nunaannut tulluarsagaanngitsunik peqartoq paasinarsivoq. Taakkununngalu ilaavoq atortorissaarut uutortaasartoq, biilinut oqimaatsulerissutinut aamma bussinut inunnik assartuisussanut Europami inatsisit malillugit atugassaasoq. Uuttortaatip taassuma nalunaartarpaa bussimi aquttoq qaqugu unikkallartussaanera, bussilu qaqugukkut uninngasartussaasoq. Maanili ingerlatinneqaannartarnerata kingunerisaanik bussi ingerlajumajunnaarsinnaasarpoq, Teknikkimut avatangiisinullu ingerlatsivimmi pisortaq Sem Ottosen nassuiaavoq.
Bussimi uuttortaatip Europamut tulluarsagaasup saniatigut issilernerani bussi aamma unittoorsinnaasarpoq.
-Bussip atortorissaarutaata ilaat Ad-Blue-mik taaneqartartoq bussip unittoortarneranut peqqutaavoq, tassami Ad-blue nunani issittuni tulluanngitsoq paasinarsimmat. Taanna tarajuliuvoq pujormillu saliisuulluni, issittumilu qerisarpoq taamalilluni bussip ingerlaarnera unittoortarluni. Taannaavorlu ukiuunerani unittoortarnerani annertunerusumik ajornartorsiutaasartoq, Sem Ottosen naggasiivoq.