Qaqortumi igalaaminernut qillertuusanullu eqqaaviit 2021-mi 7,3 tonsinik oqinnerunngitsunik igitsiviusimapput.
2021-mi igalaamernit 7059 kiilut aamma qillertuusat 310 kiilut Qaqortumi eqqaavinnut immikkoortitseriviusunut iginneqarsimasut, 2020-imi iginneqarsimasunut sanilliullugit oqileriarsimapput. Tassami 2020-mut sanilliutissagaanni 1342 kiilunik oqinnerupput, taamaakkaluartorli immikkoortitseriviit atorluarneqarnerat Kommune Kujallermi Avatangiisinut teknikumullu ingerlatsivimmi pisortap nuannaarutigaa.
-Igalaamernit qillertuusallu 2021-mi katersorneqarsimasut ukiup siulianut sanilliullugit ikileriaateqarsimagaluartut suli atorluarneqarnerat nuannaarutigaara, neriuppungalu ukioq manna igalaaminernut qillertuusanullu eqqaaviit atornissaat eqqumaffigineqarnerulerumaartoq, Teknimut avatangiisinullu ingerlatsimmi pisortaq Sem Ottosen oqarpoq.
Angerlarsimaffippassuarni eqqaavik ataaseq eqqagassanut tamanut eqqaavittut atorneqarsinnaasarpoq, tamannali allanngortillugu eqqakkanik immikkoortiterinerulerneq avatangiisinut mingutitsinnginnissamut qulakkeerinneqataassaaq.
-Igalaamernit qillertuusallu eqqavinnut naliginnaasunut iginneqarsimasut ikuallaavimmut ingerlateqqinneqartarput, ikuallanneqarnerminnilu avatangiisinut mingutitsisarlutik. Tamatuma saniatigut ikuallaavimmi ikuallanneqarnermikkut atortorissaarutinut aserorsaataasarput, Sem Ottosen nassuiaavoq nangillunilu.
-Taamaattumik kaammattuutigerusunnarpoq eqqagassanut immikkoortitsinerunissarput eqqumaffiginerulissagipput, kommunittami sulinermini nunarsuarmi piujuaannartitsinissamut anguniakkat tunaartaralugit sulinermik siunnerfeqarnera taperserlugu ikioqatigiissinnaavugut.
Kommuni Kujallermi illoqarfinni tamani igalaaminernut qillertuusanullu eqqaaveqarpoq, taakkulu saniatigut 2021 eqqakkanut avatangiisinut mingutitsisinnaasunut eqqaaviit karsit aappaluttut illoqutigiinnut tamanut agguaanneqarnikuupput.