Narsami najukkami ataatsimiititaliaq ukioq 2021 naalersoq nutaalluni atuutilersoq, assigiinngitsunik suliassaminnik suliniuteqalereerput.
Narsaq illoqarfittut piorsarniarlugu najukkami ataatsimiititaliami inissittut sisamaasut suliniutissaminnik eqqartuillutik aallartisalereerput soorlu, sanaluttarfiit aamma puttasut pittanngorsarlugillu siuarsarnissaat anguniarneqarpoq. Taamaattorli innuttaasut Narsarmiut suleqatiserinissaat siunertaannut ilaavoq.
- Sulinissami tullinnguuttuni innuttaasut qanimut naapinnissaat siunertatsinnut ilaavoq, taakkumi Narsami illoqarfitsinni suut amigaatiginerigut qanorlu illoqarfeqatigiiulluta suleqatigiissinnaanerluta siunnersuisinnaapput, Narsami najukkami ataatsimiititaliami siulittaasoq Lars Kristian Egede oqarpoq.
Siulittaasup Lars Kristian Egedep ilanngullugu oqaatigaa neriuutigalugu ilaasortamik ataatsimik ilaqqissinnaassallutik, tamannalu pillugu ataatsimiinnissani tulliuttuni ilaasortaqatitillu eqqartorumaaritsik oqaatigalugu.
Najukkami ataatsimiititaliami ilaasortat ima inissisimalerput: Siulittaasunngortoq, Lars Kristian Egede. Terkild Frederik Lund. Juliusigne Egede aamma Susanne Lynge.