Kujataani kalaalimineerniarfiit KAPS tassa Kujataani Aalisartut Piniartullu Suleqatigiit ataani akisussaaffigineqaraluartut ukioq 2022 aallarnerfigalugu Kommune Kujalliup teknikkeqarfiata ataani akisussaaffigineqalerput.
Kalaalimineerniarfiit kommunimit akisussaaffigineqalerneri politikkikkut aaliangiunneqarpoq, Kommune Kujallermilu borgmesterip akisussaaffik tamanna pillugu ima oqarpoq:
- Uggorinngitsuunngilara KAPS kommunalbestyrelsemi atorunnaarsittariaqarsimagatsigu. Tamanna peqquteqarpoq amigartooruteqarfiuallaarmat, kommuunimullu immikkut aningaasaleeqattaarneq millioninik aningaasartaqarsimalluni.
Kalaalimineerniarfinni immami nunamilu pisaat kiisalu naatitat nioqqutaasarput, tassa aalisartut piniartullu pisaavi.
- Neriuutigilluinnarpara siunissami kommuunitsinni Kalaalimineerniarfiutitta inerisaqqinnissaannut ISG peqatigalugu ingerlatsiumaarluta, taamaalilluta kinguaassatta aamma kalaaliminernik nutaartugassaqartuarnissaat, ukioq kaajallallugu, qulakkeerumallugu. Minnerunngitsumik nunalerisortatta naatitanik assigiinngitsunik pissaqartitsisarneri ingerlaannarniassammat, Stine Egede oqarpoq.
Kommune Kujallermi illoqarfinni tamani kalaalimineerniarfiit Januaarip aallaqqaataani 2022-imi Kommune Kujallermi Teknikkeqarnermik Avatangiiseqarnermillu Ingerlatsiviup ataani akisussaaffigineqalerput.