Kommune Kujallermi Aningaasaqarnermut Ataatsimiititaliaq decembarip ulluisa 16-ianni 2021 ataatsimiinnermini aalajangerpoq Kommune Kujallermi utoqqalinersiat siusinaartumillu pensionisiat qaammammi ulluinnarmi kingullerpaami tunniunneqartalissasut qaammammusiat allat tunniunneqartarnerat assigilerlugu.
Ilaqutaasut namminneq qaammammusinissartik sioqqullugu utoqqarnit aningaasanik atorniartarnerat utoqqaat utoqqarnillu sullissisut amerlaqisut ajornartorsiutaanerartarmassuk periaaserineqarsimagaluartoq allanngortinneqarpoq. Atorniaqattaartarneq utoqqarnut nuannerneq ajorpoq eqqissisimanartaranilu, tamannalu matumuuna aaqqinniarneqarpoq. Tamatuma saniatigut utoqqarnut taarsiinngitsoortut amerlasaqaat, utoqqaallu kommunimut ikioqqqusariaqartarlutik.
Kommune Kujallermi utoqqalinersiat siusinaartumillu pensionisiat 2020 aamma 2021 ulloq qaammammusiffik sioqqullugu tunniunneqartaleraluarput. COVID-19 pissutigalugu taama aalajangertoqarsimagaluarpoq.
2022-mi utoqqaalinersiat siusinaartumillu pensionisiat tunniunneqarfiat siulleq tassaassaaq ataasinngorneq 31. januar.