Kujataani kalaalimineerniarfiit KAPS tassa Kujataani Aalisartut Piniartullu Suleqatigiit ataani akisussaaffigineqaraluartut ukioq 2022 aallarnerfigalugu Kommune Kujalliup teknikkeqarfiata ataani akisussaaffigineqalerput.
Siorna maajimi aqutsisutut ilinniagaq Mini MBA Grønlandimik taagorneqartoq, Kommune Kujallermiit aqutsisunik pisortanillu peqataaffigineqartoq aallartippoq.
Innuttaasunut sulisunullu pitsaasumik sullissinissaq pitsanngorsartuarnissaa anguniagaavoq, pingaartinneqarporlu aqutsisut sulisullu ilisimasanik sakkussanillu nutaanik immersorneqartuarnissaat.
- Sulisut aamma aqutsisut piginnaasaasa qaffassartuarnissaat pingaaruteqarpoq, pisortaqatigiit suleqatigiinnerminni sakkussanik ilisimasassanillu annerusunik pissarsisinnaammata. Pisortat aqutsisullu ilinniartinneqarneranni siunertaavoq pisortaqatigiit akornanni ataatsimoortumik sulinerulernissaq, minnerunngitsumillu innuttaasunut sulisunullu pitsaanerusumik sullissinissaq, allattoqarfimmi pisortaq Max Heilmann Larsen oqarpoq.
Aqutsisutut ilinniarneq - Mini MBA Grønland, Danmarkimi Aros Business Academy-miit aaqqissorneqartoq arfinilinnik moduleqarpoq, ukiullu affaanik sivisussuseqarluni.
Periarfissaq tamanna aqqutigalugu ilinniarsimasut Kommune Kujallermi borgmesterip qujamasuutigai.
- Qujamasuutigaara kommuunitsinni pikkorissaanerit ingerlassinnaammata, neriuppungalu naammassinnittut ilinniagaq suliaminnut atorluarlugu iluaqutigiumaaraat, allagartartaartut tamaasa pilluaqquakka, Stine Egede oqarpoq.