Nanortalimmi Najukkami Ataatsimiititaliamut ilaasortat siullermeerlutik ataatsimiinerminni atuuffissaminnut inissitsiterput, aapassaannillu ataatsimiinerminni suliassannik aallarnisaallutik.
Najukkami Ataatsimiititaliaq siullermeertumik ataatsimiinermini qinigaaffimmi siullermi ilaasortat suliaat eqqartorneqarput, aappassaanilu ataatsimiinnermi ukioq naatinnagu aningaasat sinneruttut atorluarniarnissaanik eqqartueqatigiittoqassasoq siulittaasunngortoq oqarpoq.
- Siullertut Najukkami Ataatsimiititaliap siuliisa suliaat eqqartoqqaarpavut, suliat naammassisassat allallu inissitsiterlugit. Ukiup naanginnerani aningaasaativut kingulliit atorluarumallugit qanoq iliussanerluta ataatsimeeqqinnissami tulliuttumi eqqartussavarput, ataatsimiititaliami siulittaasoq Augustinus Augustinussen oqarpoq.
Najukkami ataatsimiititaliami ilaasortaasut sisamat tamarmik illoqarfimmi pitsanngorsaataasinnaassunik piukkussaqarput, ilaatigut tatsip Nalunniartarfiup piorsarnissaannik aamma illoqarfiup tikikkuminarnissaannik siunertaqartunik.
- Nalunniartarfiup eqqaata piorsarnissaa soorlu meeqqanut, inersimasunut utoqqarnullu aneerfigiuminarnerunissaa sulissutigissavarput. Illoqarfiup tikikkuminarnissaa aamma suliniutigaarput, soorlu angallatit qulimiguullillu tikittarfiini takujuminartunik allagartanik pilersuinissaq siunniukkipput, Nanortalimmi Najukkami Ataatsimiisitaliami siulittaasoq Augustinus Augustinussen oqarpoq.
Najukkami Ataatsimiititaliaq inississornerminni ima inissisimalerput:
Siulittaasoq Augustinus Augustinussen, siulitaasup tullia Didda Isaksen, ilaasortallu marluk Hans Erik Enoksen aamma Ivalo Josiassen. Ilaasortat tallimaata illoqarfimmut allamut nuuttussaanera pissutigalugu najukkami ataatsimiititaliami ilaasortat sisamaanaagallassasut siulittaasup ilanngullugu oqaatigaa.