Kommune Kujalleq ilaqutariinnik paarsisartunik nalinginnaasunik, oqilisaassisartunik kiisalu nukinginnartumik tigusisartunik pissarsiorpoq. Kommune ilaqutariinnik paarsisartunik Nanortalimmi, Narsami kiisalu Qaqortumi amigaateqarpoq.
Oqilisaassisartuujumagussi paarsisartuujumagussiluunniit pingaaruteqarpoq:
• Inissaateqarlusilu, piffissaqarlusilu nukissaqarnissarsi.
• Meeqqanik inuusuttunillu sullissinermik misilittagaqassasusi.
• Meeraq aalaakaasunik toqqissisimanartunillu avatangiiseqartissinnaassagit ineriartorneranilu tapersersorsinnaassagit.
• Meeqqap angajoqqaavinik kiisalu pisortanit oqartussanik suleqateqarsinnaassasusi.
• Peqqissuussusi.
• Pinerlussimannginnermut uppernarsaateqartusi meeqqanillu pinerliisimannginnermut uppernarsaateqartusi.
• Aalajangertigasi suut isumaliutigisariaqarisi.
Paarsisartuuneq / oqilisaassisartuuneq ilaqutariit tamarmiullutik akuuffigisarpaat. llaqutariittut paarsisartutut ukioq kaajallallugu ulloq unnuarlu piareersimasariaqarpusi.
Ilaqutariittut inuunersi, ulluinnasi, sapaatit akunnerinik naanersiortarnisi feeriartarnisilu allanngussapput, qitornarsiallu amerlatisuutigut inersimanut pitsaasumik attaveqartarsimannginnamik ullormut akunnerpassuarni pisariaqartittassavaasi.
Meeraq nutaaq ilaqutariinnut ilanngutissaaq, ulluinnassinnut qitornasilu inuunerinut sunniuteqalerluni. Meeraq sunik ajornartorsiuteqarsinnaava?
Meeraq piffissami killilimmi ilaqutariinnissaaq, sivikissinnaavoq sivisusinnaalluniluunniit
Meeqqap iluaqutissaanik meeqqap angajoqqaavinik suleqateqarsinnaassaasi
Qanoq ilaqutariittut paarsisartunngortoqartarpa?
• Paasissutissanik immersugassamik immersuissaasi
• Ilissinnut tunngasunik, peqqissusissinnut, pinerlussimannginnissinnut meeqqanullu innarliisimannginnissinnut paasissutissanik pissarsiniartoqarnissaanut akuersissuteqassaasi paarsisartunngornissamullu akuersissummik qinnuteqassallusi
• llaqutariinnut paarsisartunut siunnersortimit pulaarneqassaasi, taassumalu assigiinngitsunik apersussavaasi akuerineqarsinnaanersusilu naliliivigissallugu
Meeraq paarsassaq nuutsinnagu qanoq pisoqassava?
Kommunimit inissiisuusumit sulisoq ilissinnut pulaassaaq, taavalu meeraq pisullu qanoq ittuuneranik ilisimatillusi. Suliassarsi pillugu sunik piumasaqarfigineqarnissinnik ilisimatinneqassaasi
• Alloriarnermi tullermi meeqqap angajoqqaavisalu pulaassavaasi
Ilaqutariittut paarsisartutut isumaqatigiissut
Meeqqamik paarsaqalerussi ilaqutariittut paarsisartutut isumaqatigiissusiortoqassaaq isumaqatigiissutinik makkuninnga imaqartumik:
• paarsinersiutit amerlassusii
• immikkut aningaasartuutaajunnartut
• isumaqatigiissummik atorunnaarsitsinermut malittarisassat
• angajoqqaanik suleqarneq
• nakkutilliineq ilitsersuinerlu
Meeraq paarisassaq nutserpat qanoq pisoqassava?
• amerlasuutigut, tamatiguunngitsorli, meeraq aallaqqaammut ilissinnut tikeraartuinnartut misigeqqaassaaq, qaammatillu 3-4 ingerlareersinnagit ilissi meeqqalluunniit paarsap ulluinnaat nalinginnaasutut isigilernavianngilai.
• qitornassi meeraq alla ilisarisimalerniartariaqassavaat, ulluinnaallu allanngornerat sungiunniartariaqassallugu
Paarsaqarnermi suut ajornartorsiutaasinnaappat?
• meeraq paarsaq qitornasilu sinngagiittarsinnaapput
• Imminut amigarisutut misigisinnaavusi
• Ilaquttat, ikinngutit sanililluunniit ilimaginngisaraluamik qisuariarnerat nalaattarsinnaavarsi
• meeqqap angajoqqaavi paarsaqarnerup nalaani angajoqqaatut suli oqartussaassuseqassammata assersuutigalugu meeraq killortissappat allatulluunniit pissappat akuerseqqaartassapput , meeqqamullu paarsamut pitsaanerusorisassinnik tamatigut iliortarnaviaratik.
• meeqqap paarsap misigissutsini ilissinnut ersersissallugit ajornartorsiutigisinnaavai
• meeraq paarsaq ilissinnut, atuarfimmut, allanullu sungiussiuminaatsitsisinnaavoq.
• ”pisortani ilaqutaaneq” pissutigalugu suliffeqarfimmi suleqatit inissiineq pillugu ilissinnit allaasunik isummersorsinnaapput
Inissiinerup ingerlanerani ilaqutariinnut paarsisartunut kikkut tapersersuisuusarpat?
• Isumaginnittoqarfimmi sulisunit akuttunngitsumik pulaarneqartassaasi meeqqamut paarsamut nakkutilliisuusunik.
• Ilaqutariittut paarsisartutut ingerlaavartumik ilitsersorneqartarlusilu, tapersersorneqartarlusilu oqaloqatigalusi oqilisaanneqartassaasi. Pisariaqartitsigussi isumaginnittoqarfimmi attaveqaatissinnut tamatigut saaffigissinnaavusi.
Paarsaqarneq qanoq unitsinneqartarpa?
Paarsaqarnerup unitsinneqarnera assigiinngitsunik pisinnaavoq, assigiinngitsunillu pissuteqarsinnaalluni:
• inissiinermut tunngaviusoq atuukkunnaarpat
• angajoqqaat qitornartik angerlarsikkumappassuk
• Paarsiunnaarumallusi aalajangerussi
• paarsinerup unitsinneqarnissaanik kommune aalajangerpat
• meeraq allatut ittumik sullittariaqarpat
• meeraq paarsaq nuukkumasinnaavoq
Tamanna ilissinnut qanoq kinguneqassava?
• meeraq paarsarsi ilissinullu atallualersimasoq qanitarilersimasarsi inuulluaqqusussanngussavarsi
• paarsinersi immaqa isummassinnut uniuuttumik unitsinneqassaaq
• meeraq paarisimasarsi attavigiunnaartariaqarsinnaavarsi