Aningaasaqarnermut Ataatsimiititaliaq ulloq 16.12.2021 ataatsimiinnermini aalajangerpoq 2021-ip aasaaneraniilli sukangasumik aningaasaqarnermik aqutsiniarluni iliuuserineqalereersimasut nanginniarlugit.
Tamatuma kingunerisaanik ingerlatsiviit aningaasaqarnermut ataatsimiititaliamit makkuninnga peqqussuteqarfigineqarput:
• Suliffik aqqutigalugu angalasarnerit pisariaqavinngitsut tamarmik unitsinneqassapput.
• 5.000 kr.-it sinnerlugit pisinniarnerit Ingerlatsivimmi pisortamit akuerineqassapput. Akiligassat agguataarneqarnissaat akuerisaanngilaq.
• Atorfinitsitsinerit tamarmik pisortaanermit akuersissutigineqassapput. Ingerlatsinermut missingersuutip atorfinitsitsinermut periarfissanut sunniuteqarsinnaanera ilisimaarineqassaaq.
• Ataatsimiinnerit/isumasioqatigiinnerit, pikkorissarnerit annertunerusut sulisullu angalanissaannik nassataqartut kommunimulluunniit aningaasartuutaasussat pisortaanermit akuersissutigineqartassapput.
• Allaffeqarfimmi qaangiuttoorluni sulisimanermut akissarsititsisarnerit tamarmik unitsinneqassapput. Siunissami qaangiuttoornermut taarsiullugu sulinngiffeqartassapput, meeqqeriviit/atuarfiit assigisaalu allannguuteqassanngillat.
• Allatut ittumik nalunaaruteqartoqarnissaata tungaanut siuliani taaneqartut ingerlagallassapput.
Borgmesteri Stine Egede ima oqarpoq: ”Aningaasaqarnermik aqutsisinnaajumalluta juni 2021-mi iliuuserilereerniarlugit aalajangiussimasavut eqqortuliornerusimanerat paasinarsisimavoq, taakkulu maanna 2022-mi allatut ittumik nalunaartoqarnissaata tungaanut taakku nanginneqassapput. Sukangasumik aqutsiniarluni iliuuserineqartut ulluinnarni innuttaasunik sullissinermut sunniuteqassanngillanngillat”.