Sofie Kielsen Kuannini 13. januar 1938 inunngorpoq, inersimasuuninilu tamaat uinilu niuertuusimasoq Salomon Kielsen Qaqortumi najugaqarput.
Sofie arnaavoq ataqqisaasoq silatoorlu, oqallittunut peqataasarpoq, illoqarfimmi ersarilluartuuvoq inuppassuarnullu isumassarsiortitsisarluni. Sofie 2011-mi arnat nunarsuaq tamakkerlugu ulluanni Qaqortumi Arnarulunnguamik nersorniarneqarpoq. Ilaatigut arnat peqatigiinni amernik mersortarnermigut suliniuteqarluarsimanini nersorneqaatigaa.
Eqqaaneqartarpoq inuttut asannittutut, politikkeritut arnallu peqatigiiffiani peqataalluarnermigut ilinniartitsisartutut, inoqamminut asannittutut kiisalu meeqqaminut ernuttaminullu piffissaqarfiginnittutut.
Sofie Kielsen Atassummut ilaasortaasimavoq taamalu ililluni ukiuni arlariinni kommunalbestyrelsimut ilaasortaasimalluni, soorlu aamma Inatsisartunut sinniisuusimalluni. Sofie ukiorpassuit KGH-mi kingornalu KNI-mi naatsorsuuserisusut sulisimavoq, aamma naggatissi tikillugu suliuarpoq sunngiffimmilu atuartitsinermi atuartitsiuarsimalluni, tassami ukiorpassuarni amernik mersortitsisuusimavoq.
Sofie qanilaartuuvoq, inussiarnersuulluni siunnersuillaqqissuullunilu. Illarumatunera maqaasissavarput.
Sofiep qimagunnerani meerai, ernutai, ernutaqqiutai ilaqutaalu tamaasa misiginneqatigaakka, ullunilu artornartuni nukissaqarluarnissassinnik kissaappassi.
Sofie Kielsenip qimatarai meeqqani sisamat, ernuttani ernutaqqiutinilu.
Stine Egede, Borgmesteri