Ukioq nalliuteqqippoq, anorersuillu angallannermut sunniisaleqalutik. Kommune Kujallermi sila pissutigalugu kinguaattoornerit qalliinnarlugillusooq angallassisartut assigiinngitsut akornanni attaveqatigiinneq eqaatsumillu suleriarsinnaassuseq amigarput.
Sila
Angallannerup annersaa ullumikkut Targat atorlugit ingerlanneqarpoq. Aasaanerani silaqqitsillugu tamanna ajorneq ajorpoq.
Kisianni ukiakkut ukiukkullu anorersuartillugu Targat akuttunngitsumik angalasarput, ilaasunut toqqissisimananngilluinnartumik. Ilaasunik qianngarmik niiorartunik takusimasugut amerlaqaagut.
Sikuunera ajornartorsiutaaleraangat, Targallu ingerlasinnaajunnaaraangata, umiarsuaaqqat arriitsuararsuit angallatigineqalersarput - Qaqortup Narsarsuullu akornanni akunnerit arfineq-marluk angalanerinnarmut atorneqartarlutik. Københavnimi nassatanik tunniussinermiit Qaqortumut apuunnissamut akunnerit 17-it angallavigisariaqarput. Tamatuma saniatigut billetsi aamma akisunerusarpoq.
Aqqusaartuineq
Inuit marlunngornermi sisamanngornermilu Qaqortumiit Danmarkiliarniarunik qulimiguulimmut ilaallutik Nanortalik aqqusaarlugu Narsarsualiartariaqarput. Aqqusaartuineq taanna akitsorsaataasarpoq. Taamaaliorumanngikkaanni Narsarsuarmi unnuisariaqarpoq, aamma nammineq akilikkamik. Qulimiguulimmiit Targamut nuutsinneqaraani akiisa assigiinngissutaat utertinneqarneq ajorput. Taakku 200 koruunit missaaniipput. Ilaqutariit sisamaallutik angalaniarpata taakku aningaasarpassuanngoriissapput.
Sullissineq pitsaanngitsoq
Silap assut allanngorarnerata, kangerluup sikusarnerata sikorsuaqarneratalu nalaani eqaatsumik angalanissamut periarfissaqanngilaq. Nassatat nammineerluni angallammiit timmisartumut, imaluunniit aqqutissamut allamut assartorneqartariaqartarput. Tamatumuunakkut sullissisoqanngilaq. Air Greenland aamma Disko Line tamatumani suleqatigiinngillat.
Angalanerit allanngortinneqarsimagaangata inuit ilisimatinneqanngitsoortarnerat akulikippallaamik pisarpoq.