Qaqortumi Tasersuup Atuarfia ukioq manna atuarfik eqeersimaartutut Paarisamit nersornaasigaavoq, Kommune Kujallermi Borgmesterip tamanna tulluusimaarutigaa.
Timersornerup peqqissutsillu silarsuaani ikiuukkumatuunik maligassiuisunillu nersornaasiinerit ukiut tamaasa pisarput, tamannalu Paarisamiit, Kalaallit Nunaanni Timersoqatigiit Kattuffianniit aamma Elite Sport Greenlandimiit Maligassiuisut Showimik taallugu nuna tamakkerlugu aallakaatinneqartarluni.
Pisarneq malillugu nersornaatinik tallimanngornermi novembarip tallimaanni 2021 nersornaasiinerit ingerlanneqarneranni Paarisamiit Qaqortumi Tasersuup Atuarfia ukioq manna ”atuarfik eqeersimaartutut” nersornaaserneqarpoq.
Kommune Kujallermi borgmesteri Tasersuup Atuarfiata eqeersimaarluni atuartitsinermut atatillugu timimik atuilluartitsisarsimaneranut assut qujaniarpoq tulluussimaarlunilu.
- Nersornaaserneqarnerat nuannaarutigeqaara, meeqqallu aalanerunissaannik siunertaqartumik atuartitsineq ingerlanneqartarmat assut tulluusimaarnarpoq. Neriuutigaara siunissamut meeqqat timersornerulernissaannik ilaatigut aqqutissiuusseqataajumaartoq, atuarfinnilu allani timip atorneqarnerunissaa kissaatiginarpoq, siunertaq kusanartuummat, Kommune Kujallermi borgmesteri Stine Egede oqarpoq.
Tasersuup Atuarfiani timip aalatinnissaa pingaartinneqarpoq, taamaalilluni atuagarsornermi ilinniartitsisut timi atorlugu aamma atuartitsisarlutik.