Aaqqissuussaanikkut allanguinissami inunnik isumaginninnermi sullissineq pitsaanerulissappat sulisut amerlanerusariaqartut isumaginninnermi sulisut atorfilittallu oqariartuutigaat.
Isumaginninnermut Ataatsimiititaliami ilaasortat atorfilittallu ulluni pingasuni isumasioqatigiinnerannut atatillugu isumaginnittoqarfimmi sulisut tamarmik ataatsimiititaliamilu ilaasortat ilasseqatigiipput, matumani sulisut kissaataat pisariaqartitaallu ataatsimiititaliap siulittaasuanut apuunneqarlutik.
-Isumaginninnermi sulisut immikkoortortakkaartumik kissaatiminnik pisariaqartitaminnillu oqariartuuteqarneranni kissaaterpassuit tigusagut ataatsimiititaliamut apuuppagut eqqartorlugillu; kissaatini sulisut amerlineqarnissaannik oqariartuuteqarneq arlaleriarluni qaqinneqarpoq, isumaginninnermi pisortaq Nielsine Petersen oqarpoq.
Inunnik isumaginnittoqarfimmi atorfilittat ataatsimiititaliamilu ilaasortat isumasioqatigiinneranni isumaginninnermi suliassaqarfiusut ulluinnarnilu sullissinermi unammillernartut pillugit eqqartueqatigiinnerup saniatigut aaqqiissussaanikkut allanngortitsinissamut atatillugu inuttaasunik sullissinerup pitsaanerulernissaannut siunnerfeqarlutik siunnersuummik suliaqarput.
-Aaqqissuussaanikkut allannguinissamut atatillugu sullissinerup sukkanerusumik pitsaanerusumillu ingerlalernissaanik siunnerfeqarluta kommunalbestyrelsimut siunnersuuteqannginitsinni siulittaasutut pingaartippara sulisut peqataatilluarlugit siunnersuuteqarnissarput. Matumanilu isumaginninnermi atorfilittat sulisullu oqariartuutigisaat atorluarlugit siunnersuumik suliaqarsinnaanngorpugut. Illoqarfinni pingasuni sulisut amerlinissaannik kissaateqarneq aallaavigalugu aaqqiissuussaanikkut allanngortisinissamut inissititeriniarneq atorfilittat peqatigalugit ilusilersugarput ilusinikkiartorpoq; isumasioqatigiinnerput tamanit pissarsiaqarfiulluartoq iluarisimaarpara, Isumaginnninnermi Ataatsimiititaliap siulittaasua Pipaluk Larsen Petersen oqarpoq.
Isumasioqatigiinneq ataatsimiititaliami ilaasortanit atorfilittaniillu tamanit pissarsiaqarfiulluni iluarisimaarneqarpoq, allaffissornermili ingerlatsinermi allannguiniarneq pillugu siunersuut kommunalbestyrelsip aaliangigassaraa.
-Isumaginninnermi sulisut atorfilittallu kissaateqarnerat malillugu amerlanerusunik sulisoqalernissaanik oqariartuut sukkanerusumik sullissinerup ingerlalernissaanik kinguneqassagaluartoq qularinngilara. Ullumikkut Narsami Nanortalimmilu isumaginnermi sullissinermi aaliangiisinnaasunik sulisoqanngilaq, tamanna allanngortinneqaraluarpat sullissineq eqaannerujussuaq pisinnaanngussagaluarpoq. Ataatsimiititaliap siunnersuutigiumaagassaata inaarluni ilusinivinnissaanut kommunalbestyrelsimilu aalajangiisoqarnissaanut pissangallunga isumalluarpunga, Nielsine Petersen oqarpoq.