Assiliisoq: Sarah Woodall
“Kommune Kujallermiit qamannga qutsavigaavut “Nissi Olsennikkut” juulleriartornerani isiginnaagassialiorsimanerannut. Qilanaaqaagut pingasunngornermi decembarip aallaqqaataani 2021 isiginnaagassiap siulliup takunissaannut. Minnerunngitsumik nissimaap sumi nassaarineqarnissaa assut pissangalluta malinnaaffigiumaarparput.
Angerdla Kielsen Olsen, Nikku Olsen aamma Heina Kielsen Olsen pingaarnertut inuttaralugit isiginnaagassiamut juullimut ammartagaliassinnut alutornartumut Kommune Kujalleq aallaavigalugu suliaqarnissinnut qujanaq. Aammattaaq Nunatta Ammeriviata atisat kusanartorsuit suliarisimasaannut qujanaq. Minnerunngitsumillu immiussamut peqataasimasut allat tamaasa qujaffigiumavakka. Pissangalluta kikkuusimanersut malinnaaffigissavagut.
Kingullertut minnerunngitsumillu Georg Kiiu Olsen filmiliornerup kusanartumik, nipigissumik ataqatigiisaarlukkamik aammalu ilitsersuilluarninnut assut sulisimaninnut qujanaq.
Inuit ilinniagarisimanngisaraluaminnut piumassuseq atorlugu angusaqarluarsinnaannerannut takutitsisusi qamanngavik qutsavigaassi. Maligassiuilluarpusi.”