Allattoq: Stine Egede, Borgmesteri
Ukiorpassuarni Naalakkersuisooqatigiit kommunalbestyrelsillu qassiusimassagaluaqinersut eqqartortuarsimasaat, kiisami piviusunngoraluttualerpoq.
Tulluusimaarutigaara qineqqusaarutitsinnik piviusunngortitsileratta.
Ukiorpassuarni piviusunngornissaannut ilungersuuteqarsimasut qujaffigiumavakka. Peerutereersimasuttaaq eqqaanngitsoorumanngilakka.
Naalakkersuisunut qujassutiga manna aqqutigalugu apuukkusuppara. Aningaasat nassaariniarneri imaanaasimassanngeqisoq takorloorsinnaavara, tassami naammattunik aningaasanik illuartitsisoqarsimannginnera paasigatsigu neriuutaarutingajannaraluarmat, naak 15. november 2018-mi aaliangerneqarmat piviusunngorumaartoq upperiuarsimagaluarlugu.
Maanna kommuunitsinni pilersaarutit ingerlanneqareersut nangillugit periusissanik sulineq, tulluussarnerillu suliassatta tullerisussanngorpaat.
Piffissami kingullermi inuussutissarsiortut assigiinngitsunik sammivillit inerisaarusussusillit saaffiginnittartut arlalissuit sinaakkutissaannik suliaqarnissaq ingerlatissavarput.
Narsarsuup siunissami qanoq atorneqarnissaa pilersaarusiussavarput.
ISG annertuunik piareersaatinik suliaqareernikuuvoq, tamakkulu maanna piviusunngortikkiartornissaat ingerlateqqinneqassapput.
ISG-mi siulersuisut nutarteqqammerput. Sulinerlu aallartereerpaat, ilaatigut Islandimiunik oqaloqateqarnerit aallartereerput. Ilaatigut siunertaralugu takornariaqarnermi aqqutit kujataanut toqqaannartut annertunerusumik aqqutissiuunnissaat.
Aqqut suli takisussaavoq, tassami suliariumannittussarsiuusinerit ingerlaqqaassapput. Neriuppungali ukiumi nutaami qaartiterinerit aallartikkumaartut.