Kommune Kujallermi allaffimmiunngorniat Nanortalimmiit, Narsamiit Qaqortumiillu digitalikkut naapeqatigiinneq ingerlappaat. Pissarsiffiulluarsimasoq naapeqatigiinnermi aaqqissuisoq oqarpoq.
Allaffimmiutut ilinniartut Kommune Kujallermi allaffissornermik sulillutik misiliisut arfineq-marluk tallimanngornermi novembarip ulluisa 12-anni naapeqatigiipput, allattoqarfimmilu allaffimmiutut suliffimmik misiliisoq naapeqatigiinnerinnaangitsoq pissarsiatilli ingerlateqqissagitik oqaatigaa.
- Ilinniartoqatigiiulluta sulinitsinni pissarsiagut avitseqatigiissutigaavut, suleriaatsinillu pitsanngorsagassanik eqqartuilluta. Soorlu systemit atukkavut, sulisitsisuniit ilinniartinneqarnivut, allallu ilinniarnermut sulinermullu tunngasut, taakkulu ataatsimiinnermi imaqarniliamut allattukkavut pisortanut anngunneqassapput, Gudrun D. Mathiessen oqarpoq.
Ilinniartut naapeqatigiinnissaat siunniunneqartoq sulianik avitseqatigiinnissamik, sulianillu pitsanngorsagassaasinnaasunik eqqartueqatigiittoqarsinnaanik siunertaqarpoq. Tamannalu pissarsiffiulluarmat siunissami attatiinnarneqarnissaa neriuutigineqarpoq.
- Naapinneq pissarsiaqarfiulluarmat siunissami taamatut avitseqatigiittarnissap attatiinarnissaa kissaatiginarpoq, uumali siulliup tulleqartinnissaa qulakkeerumallugu decembarip pingajuanni naapinnissaq aalajangiupparput, tassanilu pisortat qanoq qisuariarsimanerat eqqartussavarput. Gudrun D. Mathiessen oqarpoq.