Kommune Kujallermi aalanerunissamik aamma plastikkimik atuinikinnerunissaq siunertaralugit, allattoqarfik eqqaavinnik ikilisaareersorlu Isumaginnittoqarfik aamma utoqqaat illuat Ajarsivasik eqqaavinnik ikilisaapput.
Utoqqaat illuani Ajarsivasimmi eqqaaviit 16-it piiarneqarput. Eqqaaviit peerneqartut sapaatip akunneranut tallimariarlutik puusiartai taarserneqartarput, taamaalillutik Ajarsivasimmi eqqaavinnut ukiumut 5008-inik plastikkinik puusianik sipaarnerulerput.
Ajarsivasimmi sulisut eqqaavinnik kisimik piiaanngillat, puusiaq plastikkiusoq taarsiullugu siparni erruutinut atoriikkanut errortassaasivittut atorneqalerpoq. Ajarsivasimmi sulisut taamaasillutik puusiaaqqat plastikkiusut ukiumut katillugit 1002-t mingutsissanngilaat. Utoqqaat illuani aqutsisup pinngortitamut mingutsitsinnginnerulerneq siunertaralugu kamippaat qaavisigut atortakkat plastikkiusut aamma atorunnaarsippai.
- Eqqaavinnik puusianik plastikkinik ikilisaanitta saniatigut aamma kamippaat qaavatigut plastikkit tungujortut atorneqartartut peerpagut, taamaasilluta plastikkinik asuli atuineq maani anikillisingaatiarparput, Naja Kriegel Ajarsivasimmi aqutsisoq oqarpoq.
Aalanerunissamik pinngortitamillu mingutsitsinnginnissamik siunertaqarluni eqqaavinnik ikilisaanissaq Kommune Kujallermi allaffimmiunngorniap aaqissuusaraa, taannalu eqqaavinnik ikilisaanneq sulisunit tigulluarneqarluarnissaa kissaatigaa.
- Inuiaqatigiit tassaavugut pinngortitamut paarsisussat, Kommune Kujallermilu pinngortitaq kusanartigisoq neriuppunga sulisuniit tigulluarneqarumaartoq Kommune Kujallermi allattoqarfimmi ilinniartoq Gudrun D. Mathiassen oqarpoq.
Kommune Kujallermi sulisut kissaatigippassuk eqqaaviit ilanngarnissaat, taava eqqaaviit allattoqarfimmut tunniussinnaavaat.