Asasakka meeqqat, ullumikkut FN-ip nunarsuaq tamakkerlugu meeqqanut ullorititaraa, taamaammat tamannguassi qamannga pisumik pilluangaaritsi.
Meeraq kinaluniit pisinnaatitaaffeqarpoq, taakkulu pisinnaatitaaffigisasi pillugit eqqaamassavarsi isumassinnik ataqqineqarnissarsi pisinnaatitaaffigigassiuk, oqarsinnaatitaagassilu.
Tamannali paasineqassanngilaq meeqqat angajoqqaamik piumasaannik perorsaanermillu aallaaveqartunik qimarratiginninnissaat. Meeqqammi tamarmik toqqissisimanartumik peroriartornissaat inersimasut tamatta akisussaaffigaarput.
Angajoqqaassi perornissarsi eqqarsaatigalugu siunissami akisussaaffimmik tiguseqqinnissassinnut ilinniartitsinissamik pisussaaffeqarput, piumasaqaateqarfigineqarnerlu ikioqatigiinnermik pilersitisartoq siunissami nammineerlusi ingerlalernissassinnut iluaqutigissavarsi.
Taamaammat oqaaqqissaarutit piumasaqaatillu taamaattut ilaanni nuannernerpaasanngikkaluartut akisussaaffimmik tiguseqataallusi peqataaffigisassavasi, siunissami iluaqutigissagassigit.
Meeqqatut pisinnaatitaaffissi atorlugu aamma meeraqatisi peqatigalugit nuannisaqatigiittarnissarsi inissaqartittassavarsi; Timersornikkut, timimillu aalatitsilluni pinnguaqatigiinnikkut, aamma ataatsimoornerni pinngortitami atorluaanikkut.
Kommunalbestyrelsimi pisinnaatitaaffigisassi qulakkeerneqarnissaat aamma pitsaasumik avataangiiseqarnissarsi pillugu kommunalbestyrelsemi ukiuni tulliuttuni sulissaagut.
Matumani atuarfinni pitsanngorsaaqqinneq, meeqqat atuarfiini nerisaqartitsinerup eqqunneqarnissaa, meeqqanit sullissisut ilinniarsimasuunissaat, Narsami Nanortalimmilu meeqqeriviliornissaq aamma nunaqarfinni savaateqarfinnilu meeqqat angajoqqaaminni sivisunerpaamik angerlarsimaannarnissaat ilaatigut anguniagaralugit anguniagassaraagut.
Qinikkalli innuttaasullu tamatta akisussaaqatigiinnerput, akisussaaffimmillu tigusinissamik ilinniartinneqarnissamik pisussaaffeqarnerput eqqaamassavarput.
Asasakka meeqqat ullorsiornissinni pilluaqqoqqippassi, neriuppunga ulloq manna ullorsioqatigiillusi nuannisarfigikuloorumaarissi.