Inuusuttut ingerlariaqqinnissaannik siunertaqarluni Boot Campertitsineq inuusuttuniit 15-iniit peqataaffigineqartoq ataatsimut isigalugu ingerlalluartoq pikkorissartitsinermi suleqataasup oqaatigaa.
Inuusuttut ilinniarlutik sulillutilluunniit ingerlariaqqinnissaannik siunertaqarluni pikkorissaaneq Qaqortumi ukiuni kingullerni ingerlanneqartartoq ukioq manna sivisunerulaartumik ingerlanneqarpoq. Qaqortumiit Narsamiit aamma Nanortalimmiit inuusuttut peqataasut akisussaaffimmik tigusisinnaaneq ilikkalertorsimagaat pikkorissartitsinermi suleqataasoq oqarpoq.
- Akisussaaffik ilinniarpaat, sulinermi atuarnermilu piffissap eqqumaffiginissaa tassuuna takusinnaalertaramikku suut periarfissaanersut. Ilikkariartuaarpaallu piffissaq eqqorlugu takkuttarlutik. Ataatsimut isigalugu ingerlalluaqaat, uniinnartut ataasiakkaaqaraluartut, pikkorissartitsinermi suleqataasoq Eigil Kristensen oqarpoq.
Inuusuttunut pikkorissaaneq siornatigorniit timersornertaqarnerusoq ingerlanneqarpoq, tamannalu peqataassuniit atorluarneqarpoq.
- Timersorusuinnavittalerpunga, fitnesserlutalu pisuttuarlutalu arlaannik suliaqartaratta. Maani peqataanera siunissami atorluarsinnaassavara, soorlu asuli eqiasuppallaarnanga uninngavallaarnangalu aamma akisussaaffimmik tigusinerullunga, 17-inik ukiulik Salik Kristensen oqarpoq.
Marlunngornermi novembarip arfineq-sisamaanni inuusuttut pikkorissartut Great Greenlandimut alakkarpakka, ilaat amernik mersorlutik uummataasaliortut, ilaat aqerluusaassivimmik mersugassaminnik qiortaasut, ilaallu amernik errorsillutillu panersiisut iserfigaakka. Peqataasup ilaata sulinini nuannareqaa.
- Maani sulinerput nuanneqaaq pissarsiaqarnarlunilu, amminik errorsillutalu panersiivugut. Pikkorissarnermi pissarsiakka arlaatigut atorluarsinnaavakka, soorlu ullaakkut itiaarsinnaaneq, pikkorissarnermi peqataasoq Hans-Ulloriaq Korneliussen oqarpoq.
Inuusuttut Boot Campernerat oktobarip ulluisa 26-anni aallartittoq, novembarip ulluisa aqqaneq-aappaanni naammassivoq, februarillu naanissaata tungaanut suliffimmik misiliissapput.