Aalanerunissamik aamma plastikkimik atuinikinnerunissaq siunertaralugu Kommune Kujallermi Allattoqarfik allaffinni eqqaavinnik ikilisaavoq.
Kommune Kujallermi Allattoqarfimmi eqqaavimmut puussiat plastikkiusut ukiumut katillugit 4000-it missaanniittut atorneqartarput, tamannalu annikillisarniarlugu timilu aalatinnerulersinniarlugu eqqaavinnik piiaasoqarpoq.
- Eqqaaviit ikilisarpagut pissutigalugu ukiumut puussiat 4000-it missaanniittut maani immikkoortortaqarfitsinni atortaratsigit, pinngortitamut eriaginninniarluta aamma timi aalatinnerunissaa pillugu eqqaavik ataasiinnanngorpoq, Kommune Kujallermi Allattoqarfimmi allaffimmiutut ilinniartoq Gudrun D. Mathiassen oqarpoq.
Allaffimmiutut ilinniartup Allattoqarfimmi sulisut allaffigai Allattoqarfimmi eqqaavinni puussiat atorneqarneri annikillisinniarlugit allaffinniittut eqqaaviit tamaasa piiarneqartut, taamaasilluni sulisut igitassaqarunik paarlersuarmukaqqaarlutik igitsiartortassasut.
- Inuiaqatigiit tassaavugut pinngortitamut paarsisussat, Kommune Kujallermilu pinngortitaq kusanartigisoq neriuppunga sulisuniit tigulluarneqarumaartoq Kommune Kujallermi allattoqarfimmi ilinniartoq Gudrun D. Mathiassen oqarpoq.
Kommune Kujallermi sulisut kissaatigippassuk eqqaaviit ilanngarnissaat, taava eqqaaviit allattoqarfimmut tunniussinnaavasi.