Novembarip ulluisa 24-ianni 2021 kommunalbestyrelsimi amerlanerussuteqartut 2022-mut missingersuutinik akuersissuteqarput.
Missingersuutit 623 mio. kr.-nik amerlassuseqarput, taakkunanngalu 39,8 mio. kr.-it sanaartornermut atorneqassallutik. Missingersuutit ingerlatsinermi 15 mio. kr.-inik sinneqartoorfiusussanngorlugit kommunalbestyrelsip akuersissutigai.
Isumaginninnermi siusinaarluni iliuuseqarneq, ilinniartitsisut akissarsiaat, kiisalu inuit tamakkiisumik sulifeqarsinnaanngitsut suliffissarsiuunneqarnissaat ilaatigut tassaapput kommunip pingaarnersiuinerani salliutinneqartut.
Borgmester Stine Egede oqarpoq: ”Isumaginninnermut aningaasartuutit, tassa siusinaartumik pensionisianut suliat, kiisalu meeqqanik angerlarsimaffiup avataanut inissiinerit pillugit suliat, kommunitta aningaasaqarneratigut assorsuaq ilungersunartorsiortitsipput. Sapinngisamik inuit amerlanerpaat sulilersinneqarnissaat ilaqutariillu ikiortariallit ikiorneqarnissaat suliassarujussuuvoq, taamaalioruttami isumaginninnermi atukkat ilorraap tungaanut saatsissinnaassavavut.
Missingersuutit ataqatigiississinnaajumallugit sanaartorneq eqqaasanngikkaani suliassaqarfinni tamani aningaasaatit 5,5%-ii, katillugit 30 mio kr.-inik nalillit, siunertanut allanut atugassanngortinnissaat pisariaqarsimavoq. Allannguutit taakku maanna ataatsimiititaliat 2022-mi missingersuutiminnut ilannguttussanngorpaat.
”Ukiuni aggersuni sukangasumik aningaasaqarnermik aqutsinissarput pisariaqassaaq nanginneqassallunilu. Taamaattorli Qaqortumi mittarfiup sanaartorneqalernissaanut, tamatumalu kommunitta ineriartorneranut qaninnerusumi ungasinnerusumilu pitsaasumik nassataqalernissaanut, qilanaarpugut", Stine Egede oqarpoq.
Kommunimut akileraarutip 28%-iuinnarnissaa inassutigineqarpoq.
Sanaartornermi suliassanik pingaarnersiuinermi suliassat makku kommunalbestyrelsimit salliutinneqarput: Qaqortumi qatserisartoqarfiup qatserussuarnut inissiisarfiata allineqarnera, Qassiarsummi atuarfik aamma atuartut angerlarsimaffiat, Kujallermi Illuutit kiisalu sanaartorfigissaanermut, nunaqarfinnut, majuartarfinnut, kommunip inissiaataanik nutarterinernut asfalterinermullu agguagassat.