Gedion Schmidt aamma Inukitsoq Poulsen Qaqortumi innarluutillit inaanni Bokollektivimi najugaqarput, innarluutillillu sapaatip akunnera pikialaartitsisoqarneranut malinnaapput.
Sapaatip akunnera 41 nunatsinni innarluutilinnut sapaatip akunnerutinneqartarpoq, Qaqortumilu sapaatip akunnera assigiinngitsutigut malunnartinneqarpoq. Sammisassaritinneqartut Inukitsoq Poulsenip 41-nik ukiullip peqataaffigilluarpai.
- Ataasinngornermi kommunip tungaanut ingerlaaqatigiippugut, pingasunngornermi arsaatarfimmi pinnguaqatigiippugut ataatsimoorluta, aamma maani angerlarsimaffitsinni boorluliorpugut, tallimanngornermilu naggataarnersiorluta nereqatigiisaagut, innarluutileqatikka tamaasa sapaatip akunnera 41-mi pilluaqqunaqaat, Qaqortormiu Inukitsoq Poulsen oqarpoq.
Innarluutillit arlallit immikkut piginnaaneqartarput, Nuummilu inunngortup maanna Qaqortormiuusup nunaqqatigiillu ilisarisimalluagaat Gedion Schmidt 47-nik ukiulik sunngiffimmini nipilersornissaminik soqutigisaqarpoq.
- Aliikkusersuineq sungiutiinnarnikuuara, illoqarfiup qeqqani susoqassatillugu appittarpunga. Annermik nipilersorneq piginnaaneraara, pattagiaqarlungalu guitareqarpunga ilaannikkooriarlungalu qilaatiga tigusarpara. Sapaatip akunnera 41 iluamik peqataaffiginngilara peqqiilliulaarama, kisianni sapaatip akunnera 41 uannut malunnarujussuarneq ajorpoq, Gedion Schmidt oqarpoq.
Qaqortumi innarluutillit sapaatip akunnerani 41-mi sammisassaqartitsinerat naggaserlugu innarluutillit sulliviata Orniffiup aaqqissugaanik Katersortarfimmi nuannisaaqatigiinnertalimmik nereqatigiittoqassaaq.