Kommune Kujallermi inunnik isumaginninnermi sulisut kissaataat pisariaqartitaallu isumasioqatigiinneq aallarnerlugu ataatsimiititaliami ilaasortanut apuunneqassapput.
Isumaginninnermut Ataatsimiititaliami ilaasortat aamma Isumaginninnermi Ingerlatsivimmi aqutsisut oktobarip 31-anniit novembarip aappaat ilanngullugu isumasioqatigiissapput.
Isumasioqatigiinnissaq sioqqullugu Isumaginninnermut Ingerlatsivimmi sulisut aqutsisutik peqatigalugit kissaatiminnik pisariaqartitaminnillu eqqartueqatigiinnissaannik suliakkerneqarput, taakkulu oqariartuutigisaat isumasioqatigiinneq aallarnerlugu politikkerinut apuunneqassapput.
-Isumaginninnermi sullissinerup pitsaanerulernissaa siunertaralugu isumasioqatigiittoqarnissaa pisariaqavimmat aqutsisut ataatsimiititaliamilu ilaasortat naapeqatigiinnissaat anguniarsimavarput. Isumaginninnermi Ingerlatsiviup iluani sulisut aalajaangiisinnaassuseqartut Narsami Nanortalimmilu piginngilagut, sulisullu suliassarpassuarnik kivitassaqareersut sullissiniarneq taamaalilluni kigaallassimatinneqarsinnaasarmat innuttaasut maalaaruteqartarnerannik kinguneqartarpoq, tamannalu aaqqiiviginiarlugu alloriartariaqarpugut, isumaginninnermi pisortaq Nielsine Petersen nassuiaavoq.
Isumasioqatigiinneq innuttaasunut sullissinerup pitsaanerulernissaanik eqqartueqatigiinnissamik siunertaqarmat, isumaginnittoqarfimmi sulisorineqartut ataqatigiissaarilluarnikkut suleriusissaannik siunnerfeqartoqarnissaa isumaginninnermut pisortap neriutigaa.
-Isumaginninnermut Ingerlatsivimmi atorfinnit 52-iusunit sulisorineqartut ullumikkut 40-upput, taakkunanngalu pisortat tallimat aqutsisullu arfineq pingasut atorfeqarlutik. Sullissivimmi arfinillit atorfeqarput, aningaasaqarnermilu atorfiit tallimanik inuttaqarlutik. Sulisut amerlasusaat eqqarsaatigissagaanni aqutsisutut atorfillit amerlavallaarpat? Ataqatigiissaarilluarnikkut sullissineq qanoq pitsanngortissinnaavarput? – Apeqqutit taakku ilaatigut isumasioqatigiinnissami akissutissarsillugit isumasioqatigiinnerup ingerlanneqarnissaa aamma isumagininnermi sulisut kissaataat pisariaqartitaallu politikkerinit tigulluarneqarumaartut neriuutigivara, politikkerimmi taakkuupput allanngortitsisoqassappat aalajaangiisussat, Nielsine Petersen oqarpoq.