Kommune Kujallermi Majoriaq aamma Ineriartornermi Siunnersorti Aqqutissiiuussisuunerlu suleqatigiillutik inuusuttut 20-t ingerlariaqqinnissamut aqqutissiuutissavaat.
Inuusuttut ingerlariaqqinnissaannik siunertaqarluni Boot Campertitsisarneq ukiut siuliini sapaatip akunnerinik marlunnik sivisussuseqartarpoq, ukiorlu manna sapaatip akunnerinik pingasunik sivisussuseqassaaq.
Inuusuttut Kommune Kujallermi najugaqartut Ineriartornermi Siunnersortimit Aqqutissiuussisuunermiillu Pipaluk Lund Olsenimit malinnaavigineqassapput.
-Ukiut siuliinut sanilliullugu timersornerulerneq aallutissavarput, inuusuttut inooriaatsip peqqinnarnerusup eqqumaffigilersinnaanissaanut periarfissillugit, taamaalilluni anguniagaqarsinnaanermut aamma piumassuseqarluarneq tassuuna angusinnaammassuk, Pipaluk Lund Olsen oqarpoq.
Inuusuttut 18-it inorlugit ukiullit aqqutissiuunneqarnerminni ataatsimoorlutik najugaqartinneqassapput, akisussaaffinnillu assigiinngitsunik ilinniartsinneqassallutik.
-Inuusuttunut sammisaqartitsinerup siunertaa sisamanut agguarneqarpoq, ilinniaqqinnissaq/sulilernissaq, tatitunerulerneq, anguniagaqarsinnaanerulerneq timersornerlu, inuusuttullu peqataasussat pisinnaasaat aallaavigalugit sammisassat ingerlatissavavut, Pipaluk Lund Olsen oqarpoq.
Inuusuttut ingerlariaqqinnissaannut aqqutissiuussineq ukiut siuliini ingerlanneqartartoq iluatsilluartumik ingerlasarpoq. Inuusuttullu peqataasut ilaatigut ilinniagaqalernerannik malitseqartarpoq.
-Inuusuttut malinnaaffigalugit nuannertaqaat, pinerit tamaasa assigiinneq ajorpoq. Ukiut siulii eqqarsaatigissagaanni inuusuttut ilaat imminnut nammineerlutik saqqummersinnaanngillat, naammassilernermilu taakku annertuumik siuariaateqartarput, soorlu nammineerlutik oqalugiarsinnaalerlutik, Pipaluk Lund Olsen oqarpoq.
Inuusuttut Boot Campernerat oktobarip ulluisa 26-anni aallartissaaq, novembarillu ulluisa aqqaneq-aappaanni naammassallutik, februarillu naanissaata tungaanut suliffimmik misiliissapput.