Sapaatip akunnera 41 innarluutillit sapaatip akunneraat, tamannalu malunnartinniarlugu innarluutillit kommunimut pisoqatigiipput, Kommune Kujallermilu Isumaginninnermut pisortap pilluaqqullugillu qujassuteqarfigai.
Sapaatip akunnera 41 innarluutillit sapaatip akunneraat, tamannalu malunnartinniarlugu ataasinngornermi ullaap tungaani Qaqortumi ulloq unnuarlu innarluutilinnut angerlarsimaffik Uilormiut kommunip tungaanut nuannersumik pisoqatigiillutik ingerlaaqqatigiipput. Kommunip allaffiata silataani erinarsoqatigiillutillu kommunimut qujassuteqarput.
Isumaginninnermut Ingerlatsivimmi pisortap innarluutillit takkunnerat nuannaarutigaa, siunnersuisoqatigiinnillu pilersitsinissamik siunnerfeqarnertik oqaatigaa.
- Innarluutillit sapaatip akunneranni namminneerlutik takkullutik qujassuteqarnerat assut nuannerpoq tuppallernarlunilu. Kommune Kujalleq siullermeerluni inunnut innarluutilinnut siunnersuisoqatigiinnik pilersitsinissaq siunertaralugu suliamik aallartitsivoq, siullermeerlunilu Isumaginninnermi Ataatsimiitsitaliami oqaluuserineqareerluni taperserneqarpoq, Isumaginninnermut Ingerlatsivimmi pisortaq Nielsine Petersen oqarpoq.
Qaqortumi innarluutillit sapaatip akunnerani sammisassaqartassapput, ilaatigut timersorlutik, unammiuaarlutik, pinnguaatersorlutik nereqatigillutillu sapaatip akunnera malunnartissallugu.