Kommune Kujallermi Isumaginnittoqarfiup iluani sulisut tallimat atorfittik qimannagu Isumaginninnerup Iluani Siunnersortitut ilinniaqqipput.
Inulerisutut ilinniagallit aamma inulerinermi qaffasissumik ilinniagallit, kujataani suliffinni assigiinngitsuni atorfissaqartinneqarput. Inulerisut ilaat qaffasissumik ilinniaqqillutik ingerlaqqinneri Isumaginninnermut Ingerlatsivimmi pisortap iluarisimaarpa.
“Isumaginninnerup iluani Siunnersortitut Ilinniagartuutut Ilinniagaq maangaanniit peqataaffigineqarluni ilinniarfigineqarmat nuannaarutigaara tulluusimaarlungalu, tassami isumaginnittoqarfimmi suliffinnilu inuleriffiusuni qaffasissunik ilinniarsimasunik atorfissaqartitsivugut, isumalluarpungalu”, Kommune Kujallermi isumaginnittoqarfimmi pisortaq Nielsine Petersen oqarpoq.
Louisa F. Boassen Kommune Kujallermi Isumaginnittoqarfimmi Meeqqanut Ilaqutariinullu Immikkoortortaqarfimmi sullissisutut suliitigaluni ilinniakkani qaffasissoq ingerlappaa, tamannalu periarfissatsialaasoq isumaqarpoq.
“Taamak periarfissaqarluni assut nalitoqaaq, allat siunnersorusussavakka ilinniaqqiffissaq tigulluaqqullugu suliffimmut namminermullu iluaqutissaammat”, Louisa F. Boassen oqarpoq.
Isumaginninnerup Iluani Siunnersortitut Ilinniagartuutut Ilinniagaq ukiunik pingasunik sivisussuseqarpoq, ukiumullu sisamariarluni atuagarsorneq ingerlanneqartarluni. Louisa F. Boassenip naatsorsuutigaa ukioq 2023-imi decembarip qaammataani naammassissalluni.
Isumaginninnerup iluani Siunnersortitut Ilinniagartuutut Ilinniagaq piffissap ilaanut ilinniartitaanertut aaqqissuussaavoq, ilinniarneq ukiunik pingasunik sivisussuseqarpoq arfinilinnik semesterilik 12-inillu pilersaarusiukkanik ilinniartitaanissamut moduleqarluni. Ilinniarnerup ingerlanera modulini sammisat aallaavigalugit aaqqissuussaavoq ilinniagaq ineriartortikkumallugu ataqigiissikkumallugulu.
Perorsaanermi Ilinniarfimmi Isumaginninnerup iluani Siunnersortitut Sullissisutut Ilinniagartuutut Ilinniakkamik angusineq Isumaginninnerup iluani Siunnersortitut taaguuteqartitsilissaaq. Danskisut ima taaguuteqarpoq: Rådgiver i Socialt Arbejde tuluttullu ima taaguuteqarluni: Counselor in Social Work.
Tusarfik: https://pi.sps.gl/ka/ilinniakkat/ilinniagartuutut-ilinniagaq-isumaginninnerup-iluani-siunnersorti/