Oktobarip ulluisa 22-anni 2022 kommunalbestyrelsip immikkut ittumik ataatsimiinnerani 2022-mut missingersuutit siullermeerneqarput.
Ataatsimoortumik tapiissutit kiisalu akileraarutit amerlassusii maanna suli ilisimanngikkaluarlugit missingersuutit akuersissutigineqarput. Kommune Kujalliup isumannaatsumik imminullu nammassinnaasumik aningaasaqarnissaa 2022-mut missingersuusiornermi siunniunneqarpoq. Akilersugassat matussutissaqartinneqassapput taavalu kommunip patajaatsuunissaanut aningaasartuutinullu sillimmaffigeriinngisanut aningaasanik amerlagisassaanngikkaluanik sillimmateqartoqassaaq.
Missingersuutit agguataarneri akuerineqartut imaapput:
Suliassaqarfiit tamarmik aningaasat imminnut atugassiissutaasut amerlinissaannik kissaateqarput.
Isumaginnittoqarfik eqqarsaatigalugu siusinaartumik pensionisiaqartitsineq, meeqqanik ulloq unnuarlu paarsivinnut ilaqutariinnullu inissiisarneq ilungersunartorsiorfiupput kiisalu atorfiit inuttaqanngitsut amerlaqalutik. Isumaginnittoqarfimmi kissaatit katillutik 49 mio. kr.-inik naleqarput. Isumaginnittoqarfik kiisalu Isumaginninnermut Ataatsimiititaliaq politikkikkut anguniakkat, periusissiaq kiisalu isumaginninnermi ineriartortitsinermut pilersaarutit pillugit sapaatit akunnerisa tullianni isumasioqatigiissapput.
Atuarfeqarnermut tunngasuni kissaatit 45 mio. kr.-inik naleqarput, taakku ilaatigut kommunimi ilinniartitsisut amerlassusiligaanerisa naleqqussarneqarnissaannut kiisalu Nanortalimmi nutaamik paaqqinnittarfiliornermut atugassatut kissaatigineqarput.
Inuussutissarsiorneq eqqarsaatigalugu kissaatit 0,5 mio. kr.-iupput isumasioqatigiinnernut inuussutissarsiornikkullu suliniutinut annikitsunut tunngasuullutik.
Kulturimut sunngiffimmullu tunngasuni kissaatit katillutik 2 mio. kr.-iupput, soorlu nukarliit klubbiannut kiisalu pinaveersaartitsineq pillugu politikkimut atugassaallutik.
Ataatsimoortumik tapiissutit pillugit Namminersorlutik Oqartussat kommunillu isumaqatigiinniarnerat ungasinngitsukkut naammassisussaapput, taamanikkussarlu Kommune Kujalliup ataatsimoortumik tapiissutinit pissarsiassai paasinarsissallutik. Taamaalillutik ingerlatsiviit ataatsimiititaliallu kissaatinik saqqummiunneqartorpassuarnik tulleriiaarillutik suliaqaqqissinnaalissapput.
Borgmesteri Stine Egede ima oqarpoq: "Ingerlatsiviit pingaarnersiukkaminnik saqqummiussassaat qilanaaraakka, taakkulu ataatsimiititaliani siulittaasut peqatigalugit pingaarnersiussavakka taamaalilluta politikkitta ukiuni aggersuni piviusunngortikkiartorneqarnerani sammivimmik pingaarnermik nassaarsinnaaniassagatta.