Maanna Kommune Kujallermi innuttaasut piginnaanngorsaaqqinnermut innersuunneqarsinnaalerput.
Piginnaanngorsaqqinnerup ingerlanerani inuup ulluinnarni suliassat sungiusassavai. Piginnaanngorsaaqqinneq aqqutigalugu siunertaasoq tassaavoq Kommune Kujallermi innuttaasut uninngaannaratik namminersorlutillu inuusinnaalersissallugit, tamakkiisumik ilaannaagaluamilluunniit nammineersinnaatissallugit taamalu sapinngisamik sivisunerpaamik angerlarsimaffimminniiginnarsinnaanngortissallugit.
Angerlarsimaffimmi ikiorteqarnissamik imaluunniit eqqiarnissamut suliassanulluunniit qinnuteqartoqaraangat qinnuteqartup pisariaqartitai angerlarsimaffimmi ikiortimit nalilerneqartassapput. Aaqqissuussinermi nutaartaasutut piginnaanngorsaanerup ilumut inummut iluaqutaanera angerlarsimaffimmi ikiortimit nalilerneqartassaaq.
Piginnaanngorsaaneq qanoq ingerlasassava?
Kommunimi piginnaanngorsaasoqatigiinnik atorfinitsitsisoqarsimavoq inummut tapersersuillutillu siunnersuinissamut piareersimasunik. Kommunimiit naliliisussamik orniguttoqartassaaq inuup atugaanik paasiniaalluarluni piginnaanngorsaaqqinnerup tassunga iluaqutaaneranik naliliisussamik. Innuttaasoq kommunimi piginnaanngorsaaqqittunik peqateqarluni piginnaanngorsaaqqinneq naammassippat sunik piginnaasaqalersimanissaminik anguniagassiussaaq. Anguniakkat piginnaanngorsaaqqinnermi qitiupput.
Anguniakkat inummiit inummit assut assigiinngiiaartussaapput. Assersuutit ilaat:
- Alersilerneq
- Piumallerfikkut imerneq
- Nammineerluni nerisassiorneq
- Uffarneq perusuersartarfiliarnerlu
- Errorsineq
- Aneerneq niuerniarnerlu
Piginnaanngorsaaqqinnerup ingerlanerani inuup misigisssavaa ajornartinnagu angerlarsimaffimmi ikiorti sullissisigiinnarnagu suleqatigisassagamiuk. Taamaammat piginnaanngorsaaqqinnerup ingerlanerani angerlarsimaffimmi ikiortit angerlarsimaffimmi sungiusaasunngortassapput - inuup nammineerluni suliaqarsinnaanngornissaanut ikiuuttassagamik.
Piginnaanngorsaaqqinneq angerlarsimaffimmi ingerlanneqartassaaq, tassa angerlarsimaffimmi ikiorti aggertassaaq, taavalu inuk angorusutaminik anguniagaqarnerani ikiortassallugu. Ilaanneeriarlutik timimik piginnaanngorsaasoq pillorissaasorluunniit angerlarsimaffimmi sungiusarnermut takkutassaapput qanoq ingerlanersoq allanngortitsisoqartariaqarnersorluunniit paasiniarlugu.
Piginnaanngorsaaqqiineq nalinginnaasumik sapaatit akunnerisa sisamat 12-illu akornanni ingerlanneqartarpoq, kisiannili sivikinnerullunilu sivisunerusinnaalluni. Piginnaanngorsartup anguniakkani anguppagu, sapinngisaniluunniit anguppagu piginnaanngorsarneq naammassissaaq. Piginnaanngorsarneq naggataarlugu piginnaanngorsartoq piginnaanngorsaasullu arlaat piginnaanngorsarneq pillugu oqaloqatigiillutik naliliissapput. Piginnaanngorsartoq sungiusaqqittariaqarpat angerlarsimaffimmiluunniit suli ikiortariaqarpat tamanna ataatsimiinnermi pilersaarusiorneqassaaq.
Piginnaanngorsarnerup ingerlasarneranut assersuut
Assersuutigineqassaaq utoqqat sivitsortumik asaanermut niuerniarnermullu ikiorneqartarsimasoq. Taassuma Iikiorneqarnini nuannarigaluarlugu qaqugu qanorlu pinissaa nammineq aalajangerumanerugaluarpaa. Niuertarfiliarluni nammineq nioqqutissanik toqqartuisarneq taavalu ikinngutinik ilisarisimasanillu naapitsisarneq maqaasivai. Kommunimi angerlarsimaffimmi sungiusaasut arlaata inuk aporfik tamanna pillugu oqaloqatigissavaa, angerlarsimaffimmilu ikiortinik tamatuminnga ataqatigiissaarisoq ilisimatissallugu. Kommune piginnaanngorsaaqqinnermik suliaqalersimammat angerlarsimaffimmi ikiortip suliarisartagai inuup nammineq sapinnginnerai angerlarsimaffimmi ikiortinik ataqatigiissaarisup misissussavaa. Angerlarsimaffimmi ikiortinik ataqatigiissaarisup inuk attavigissavaa taavalu inuk qanoq pisariaqartitsinersoq sunillu anguniagaqarnersoq paasiniaavigalugu pulaassallugu.
Angerlarsimaffimmi ikiortip inuk peqatigalugu anguniagassiussaaq, pillorissaasorlu ilaanni aamma anguniagassiueqataasassaaq. Maanna inuk angerlarsimaffimmini sungiusaasumik kommunimeersumik peqateqarluni anguniakkani anguniarlugit sungiusartussanngorpoq. Aallaqqaammut inuup angerlarsimaffimminniit 20 meterit pisuummik rollatorimik atortoqarluni ingerlalluni sungiusarnissaa naammappoq. Taamatuttaaq issiffarmi natermi støvsugerluni ikiuuttassaq. Qaammatit pingasut ingerlaneranni ima pilloritsigilerpoq nammineerluni pisuut rollator atorlugu brugseniliarsinnaalerluni nammineerlunilu støvsugerlunilu asaasinnaanngorluni. Inuk nuannaarpoq tulluusimaarlunilu, timikkut tarnikkullu nukittunerulersutut misigaluni.
Piginnaanngorsaanermi kikkut sulisuuppat?
Suleqatigiit assigiinngitsuneersuupput tassaallutik angerlarsimaffimmi sungiusaasut, angerlarsimaffimmi ikiortit ataqatigiissaarisui kiisalu pillorissaasut. Piginnaanngorsaaqqinneq tassaavoq Kommune Kujallermi angerlarsimaffimmi ikiorteqartitsineq nutaaq, inummut tapersersorteqartitsineq ikiorteqartitsinerlu atorlugit inuup pitsaasumik, namminersorluni imalimmillu inuuneqarnissaanik siunertaqarfiusoq.
Piginnaanngorsaaqqinneq qanoq peqataaffigineqarsinnaava?
Kommunimi angerlarsimaffimmi ikiorteqarnermut ataqatigissaarisut aqqutigalugit neqeroorfigitittoqarsinnaavoq.
Kommune Kujallermi piginnaanngorsaaqqinneq pillugu apeqqutit kommunimi angerlarsimaffimmi ikiorteqarnermik ataqatigiissaarisunut apeqqutigineqassapput, angerlarsimaffimmi ikiortinik ataqatigiissaarisunut nuutsiffissaq tassaavoq Kommune Kujalleq 70 41 00.
Una toorlugu quppersagaq PDF filinngorlugu ammaruk