Narsami illoqarfimmi pisortaq septembarip aallaqqaataani atorfinippoq, Nanortalimmilu illoqarfimmi pisortaq aggustip aallaqqaataani atorfinilluni.
Illoqarfinni pisortat nutaat kommunini sulisoqarnermi attaveqaataallutillu aqutsisuusapput. Taakku Kommune Kujallermi allattoqarfik qaninnertut suleqatigissavaat, illoqarfinnilu pisortat qanimut suleqatigiissallutik, saniatigut ingerlatsivinni pisortat, immikkoortortaqarfinnilu pisortat aamma suleqatigilluassallugit. Kommunimi qullersat suleqatigalugit, politikkikkut suliniutit suliassallu atuuttut qulakkeerlugit illoqarfinni nunaqarfinnilu sulissapput.
Narsami illoqarfimmi pisortanngortoq ukiorpassuarni kommunimi sulereerami siunissami suliassaaleqqissanganngilaq.
-Kommunip iluani torersaanissaq siullertut suliarissavara, immikkoortortat suleqatigiiaallu torersumik ajornaanerusumillu allaffeqarlutik inissinnissai suliassaapput, tamattalu ikioqatigiilluta suleqatigiittariaqarpugut, Narsami illoqarfimmi pisortaq Ulla Rafaelsen oqarpoq.
Illoqarfimmi aqutsisup akisussaaffigai kommunip uummaarissumik sulisunut innuttaasunullu sullissilluarnissaa qulakkiissallugu, aamma allattoqarfik suleqatigalugu innuttaasunik sullissilluarnissamik pilersaarusiornikkut anguniagaqaqatigiineq suleqataaffigissallugu.
Illoqarfimmi pisortatut atorfeqarneq akisussaaffimmik angisuummik peqarmat, atorfik suliassarpassuaqartoq Nanortalimmi illoqarfimmi pisortap oqaatigaa.
-Kommune ataasiusoq siunnerfigalugu sulilluta aallartissaagut, tassalu allannguineq, uagullu kommunip iluani allaffissornermi suleqatigiinneq pitsaanerusumik saqitinnissaanut suliniassaagut. Suliassanni ilaapput Nanortalimmi kommunip inissiaataasa misissornissaat, suut atorpavut suullu aningaasartuutaaginnarlutik atorneqanngillat, taakkulu iliuuseqarfigissavagut, Nanortalimmi illoqarfimmi aqutsisoq Adolf Silassen oqarpoq.