Qaqortumi meeqqerivik Angaju nutaanngorlugu sanaartorneqareersoq ataasinngornermi aggustip 30-anni pisortatigoortumik atoqqaarfissiorneqarpoq.
Meeqqerivik Angaju atoqqaarfissiorneqarnerani Atuarfeqarnermut Meeqqeriveqarnermut Nutaaliornermullu Ataatsimiititaliap siulittaasua Bibi Kielsen ammaanersiornermi oqalugiarpoq.
- Meeqqerivik nutaaq, Meeqqerivik Angaju tassaavoq meeqqat sulisullu avatangiisigissaarlutik inuunerissaarlutillu; meeqqat paarilluarneqarfigisassaat sulisullu sulilluarfigisassaat. Sulisut avatangiisigissaartut meeqqanik timikkut tarnikkullu avatangiisigissaartitsillutik, meeqqanut pitsaanerpaamik tunniussaqarsinnaasut upperaarput, taamaattumillu neriuppunga, kissaallusilu Meeqqerivik Angaju meeqqanut sulisunullu nuannersumik ineriartorfiulluartumillu paaqqinniffiullunilu suliffiussasoq, Bibi Kielsen oqalugiarnermini ilaatigut taama oqariartuuteqarpoq.
Pisortatigoortumik oqalugiartoqareermat, Atuarfeqarnermut Meeqqeriveqarnermut Nutaaliornermullu Ingerlatsivimmi perorsaanermik siunnersorti Malene Høegh-Olsen meeqqerivittaammi meeqqanut pinngussanik tunissuteqarpoq.
Kingorna atuisut sulisullu sutoqatigiipput.