Ukioq manna Innovation South Greenland A/S-ip (ISG) Kommune Kujalliillu
suleqatigiissutigivaat Naalakkersuisut ukiumoortumik nunaqarfinnut
aningaasaliissutaat siunertanut pitsaasunut piffinnut tamanut atorneqarnissaat.
Nunaqarfinnut tamani angalaarnitsinniit, suliffeqarfeeraatilinniit innuttaasuniillu
paasisat pissarsiagut aallaavigalugit ISG-p siunnersuutigisinnaanngorsimavaai suut
suliniutit aningaasaliissutinit ilanngunneqassanersut.
Suliniutaasinnaasut marluk nunaqarfinni tamanit immikkut kissaatigineqarput -
paarnanik, kigutaarnanik qassutikunik ningittagakunillu tunisisinnaaneq. Taakkua
Kujataani imminut nammassinnaasumik suliniutinut attumassuteqartorujussuupput,
avatangiisitta pinngortitattalu minguitsuutinnissaannut. Aammattaaq piffinni taakkunani,
nunaqarfinni, suliniutit aallaveqarnissaat aammalu nunaqarfinni innuttaasunut
aningaasarsiutigineqarnissaat tassani anguneqassaaq.
Nunaqarfinni innuttaasut paarnat kigutaarnallu assaminnik nuniataminnik Alluitsup
Paani Narsarmiinilu Pilersuisumut tunisinnaangorpaat ukiaq manna. Pilersuisup
paarnat kigutaarnallu Neqi A/S-imut kingusinnerusukkut nassiutissavaat. Taakkua
Neqi A/S-imiit marmeladeliarineqassapput, nutaamik maani Kujataaniit
nerisassaliarineqassallutik.
Nunaqarfimmiut, minnerunngitsumik aalisartut piniartullu, avatangiisitsinni qassutikunik
ningittagakunillu katersuisinnaanngorput. Taakkua puukuluunut (big bags,
Pilersuisup niuertarfiinut nunaqarfinnut tamanut nassiussornikuusavut) katersorneqassapput
Pilersuisumullu tunineqassallutik. Kingusinnerusukkut taakkua qassutikut
ningittagakullu tamarmik Qalut Vönin A/S Nuummut Pilersuisumiit nassiunneqassapput.
Qulaani taaneqartut saniatigut Naalakkersuisut nunaqarfinnut aningaasaliissutaat
allanut aamma atorneqassapput. Soorlu Narsarsuarmi ataqatigiissaarinermut tunngasumut,
Qeqertaasamilu savaateqarfinnut tunngasumut, Ammassivimmi
kartoffilinik naatitsinermut tunngasumut aammalu Saarlumi qisuit nunatsinneersut
atorlugit nioqqutissiassanut.
ISG-miit tulluussimaarutigaarput suliniutit tamakkua ikiuuffigalugillu tapersersorsinnaagatsigik.
Aappaagimut aamma suliniutinut taamatut ittunut suleqataanissatsinnut
qilanaarpugut.