Iluliarmiu, anaanaq, 54-inik ukiulik Tine Pars aggustip aallaqqaataani Kommune Kujallermi pisortaanertut atorfinippoq, nunasiffigisanilu nuannareqaa.
Ilisimatusarfimmi Rektoriusimasoq ukiunilu kingullerni sisamani Peqqissutsimut Naalakkersuisoqarfimmi pisortaanertut sulisimasoq Tine Pars, aggustip aallaqqaataani Kommune Kujallermi pisortaanertut atorfinippoq.
Tine Ilulissani peroriartorpoq, ilinniarnerminullu atatillugu ukiualunni Danmarkimi najugaqareerluni meeqqani pingasuusut Nuummi ukiorpassuit najugaqarput. Meeqqani perormata Tine kisimiilluni Qaqortumut nuuppoq, kujataanilu pinngortitaq allaanerusoq malugaa.
-Qaqortumut pigama pinngortitaq soorlu qaninnerulersoq. Nuummi ukiorpassuit inuuvugut arlaannullu pinngortitamukassagaanni biilerujussuaqqaarluni angallammillu aatsaat aallaqqaarluni nuniassinnaaneq periarfissaasarpoq, taamaattumik maani allannguut malugaara, tasersuarmilu naluttarnera pinngitsoorsinnaajunnaapajullugu, Tine qungujulalluni oqarpoq.
Tine qatanngutigiinni sisamaasuni nukarliup tulliuvoq, angutaa qallunaajuvoq Peter arnaalu kalaaliusoq Jensigne maanna Danmarkimi najugaqarput. Tine Ilulissani angajoqqaamini qatanngutiminik, aanaaminik aataaminillu qanigisaqarluni peroriartorpoq. Meeraalluni atuarfimminik ataqqinneqqissaarneq pingaartitarisimavaa.
-Atuarfik meeraallungali pingaartissimavara, soraarlutalu ilinniakkeralunga aallartittarpunga, ataatama assut eqqumiigisarnikuuaa taamaattuunera, Tine Pars illarluni oqarpoq, nangillunilu. Atuarfik aallulluartarsimavara aamma timersorneq.
Kujataanut nuunnissaq Tinep siornatiguulli takorluugarereersimavaa.
-Qangali takorloortarnikuuara misilikkusullugu kujataani najugaqarnissaq aamma kommunimik sullitaqarnissaq, taakku ataatsikkoornerat assut uannut torrappoq, unalu periarfissaasoq takullugu atupallappara. Arlaannik ilaquttannik susoqanngippat takorloorsinnaavara sivisuumik maaniissallunga.
Tine sulinngiffeqarluni ilaatigut kujataanut angalasareernikuuvoq, illoqarfigilikkaminullu nuukkami takorluukkaminiit nuanninaarneruaa.
-Takorluukkanniit nuannernerujussuuvoq, inuttai aamma nuanneqaat, paasivara Qaqortormiut imminnut perujunnissartik nuannarisaraat, Tine illarluni taama naggasiivoq.
- Arlaannik ileqqupalaaqarlutit oqaatigisaqarsinnaavit?
- Aaliangersimasumik taasaqarsinnaanngilanga, kisianni nerivallaartoortarpunga nerisassat mamarigakkit.
- Nerisassanik mamarinerpaasat suua?
- Qaleralilaat kanajaatillu
- Kommune Kujallermi illoqarfinni nunaqarfinniluunniit tikissimasannik puiuikkiussannik oqaatigisaqarsinnaavit?
- Tasiusamiillutaasoraara umiatsiamut ikilerluta takuakka uilorparparujussuit nerpersoorpassuillu sissamiittut, taava oqarpunga: ”Naa utoqqaliguma maanga nuussaanga”, Tine Pars qungujulluni akivoq.