Kommune Kujallermi Pitsaaliuinermik Immikkoortortaqarfik meeqqerivinni tamani aqutsisut suleqatigalugit qinngasaarisarneq akiorniarlugu naapeqatigiipput.
Narsami, Nanortalimmi, Qaqortumi taakkulu nunaqarfiini meeqqeriviit aqutsisui peqataasoralugit kommunip ataatsimiittarfiani pitsaaliuinermik suliaqartut qinngasaarisarnermut politikki saqqummiuppaat.
- Kommunitsinni meeqqat akornanni qinngasaarisarneq akiorniarlugu ingerlariaqqiffissanik eqqartueqatigiillutalu suleqatiserinnippugut qinngasaarisarneq pillugu qanoq iliorsinnaassanerluta, Helga Nielsen oqarpoq.
Kommune Kujallermi meeqqerivinni atuarfinnilu Kammagiittap atorneqarneruleqqinnissaa Pitsaaliuinermik Immikkoortortaqarfimmi pisortap pingaartippaa, sapinngisamillu meeqqerivinni sulisunut Kammagiittartitsilluni pikkorissartitsinissaq sulissutigerusullugu.
- Kammagiitta qinngasaarinermut akiuiniassalluni periusissatsialaavoq pitsaasoq, taannami atorlugu meeqqanut, angajoqqaanut suleqatigiillu akornanni periuserpassuaqarpoq, Pitsaaliuinermik Immikkoortortaqarfimmi pisortaq Helga Nielsen oqarpoq.
Qaqortumi kommunip ataatsimiittarfiani naapinnermi Narsamiit, Nanortalimmiit, Alluitsup Paaniit Narsarsuarmiillu oqarasuaatikkut peqataasoqarpoq.