Tasersuup Atuarfiani aasap ingerlanerani igalaanik sequtserinerit arlallit ingerlareersullu atuarfimmi sammisaqartitsinikkut pitsaaliuisoqarnissaa siunniunneqarpoq.
Juulip qaammataaniit manna tikillugu Tasersuup Atuarfiani igalaat 25-t sequtseriffigineqareersut suliassaq politiinut ingerlateqqinneqarpoq, matumani nakkutilliilluni filmiliuutikkut immiussat aamma tunniunneqarsimalerput.
-Suliassaq politiinut suliakkiutiginikuuarput, uagullu iliiuseqarnissamut alloriarniarluta Pitsaaliuinermi Ataatsimiititaliaq peqatigalugu atuartunut sammisaqartitsinissaq siunniupparput. Sammisaqartitsinermi sequtserisarneq ajornartorsiutaasartullu allat soorlu nakuuserluni annersaasarneq aanngajaarniutinullu tungasut piffissami aggersumi paasititsiniutigineqarnissaat siunniupparput, Tasersuup Atuarfiani atuarfimmi pisortaagallartoq Hans Peter Broberg nassuiaavoq.
Igalaanik sequtserinerit pilerneranni atuarfimmi pisortaagallartoq angajoqqaanut aggersaasimavoq, matumanilu pitsaaliuinissamik suliaqarnissamik siunnissaq angajoqqaanut aamma saqqummiullugu.
-Isumassarsiaq angajoqqaanit peqataasunit tigulluarneqarpoq, sammisaqartitsisoqarnissaanilu angajoqqaat peqataarusullutik oqariartuuteqarnerat iluarpoq, taamaalilluni pitsaaliuinissamik oqariartuutigineqartut aamma angajoqqaat peqataanerisigut pitsaaliuineq pitsaasoq anguneqarsinnaassammat. Angajoqqaat peqataarusunnerisa saniatigut suliffeqarfinnik assigiinngitsunik peqataasoqassaaq, soorlu Brugseni Qaqortup siulersuisui peqataaniarlutik nalunaareersimasut, Hans Peter Broberg oqaluttuarpoq, nangillunilu.
-Sammisaqartitsineq ataatsimoorluni pitsaaliunissamik siunertaqartup qaqugu pinissaanik suli ulluliisoqanngilaq. Siunertaavorli piffissami qanittumi ingerlanneqarnissaa saqqummersitsinermillu naggaserneqarnissaa, Hans Peter Broberg oqarpoq.
Tasersuup Atuarfiani igalaanik sequtserisoqaqattaarnera atuartunut amerlasuunut sunniuteqartoq aammalu tujormigineqarnera atuarfimmi pisortaagallartup malugisimavaa.
-Atuartut klassikkaarlugit alakkartarpakka, malunnarporlu taamatut sequtserisoqaqattaarnera tupassutigineqarlunilu tujormigineqartoq. Atuartuutigummi atuarfimminnik paarsilluartuupput, taamaattumik periarfissaq manna iluatsillugulu atuarfitsinnik paarsilluarnerinut qutsavigerusuppakka, neriuppungalu sequtserisaqattaarnerit pisartut takussaajunnaarumaartut, Hans Peter Broberg oqarpoq.