Ulluni makkunani kujataani Covid-19-imut akiuussutissamik kapuuinerit ingerlanneqaleruttorput, periarfissallu atorluarneqarnissaa borgmesterimit kaammattuutigineqarpoq.
Narsami Nanortalimmilu akiuussutissamik kapuuinerit ingerlanneqareersullu septembarip qulingiluaanni qulingannilu Qaqortumi Covid-19-imut kapuuinerit ingerlanneqassapput. Matumani meeqqaniit 12-inik ukiulinniit akiuussutissamik kapitikkusuttunut tamanut kapuuinerit ingerlanneqarlutik.
- Covid-19-ip meeqqat akornanni tuniluussinnaanera nunatta ilaani takoreerparput, taamaattumik angajoqqaat kaammattorusuppakka meeqqat 12-inik ukioqalereersimasut kapitinnissaannut periarfissaq atorluarlugu meeqqamik kapitinnissaat isumagiumaaraat. Amerlanerusummi akiuussutissamik kapitinneratigut Covid-19-ip tuniluutipallassinnaanera aamma pakkersimaarneqarsinnaavoq, Stine Egede oqarpoq.
Qaqortumi Covid-19-imut akiuussutissanik kapuuineq septembarip qulingiluaanni aamma qulinganni nalunaaqutaq qulingiluaniit tallimat tungaannut Qaqortup Timersortarfiani ingerlanneqassaaq.
Aappassaannillu kapitinniartut aggustip 12-iani siusinnerusukkulluunniit kapitissimassapput, meeqqallu 12-niit 14-inik ukiullit angajoqqaatut oqartussaassuseqartumit ilagineqassapput allakkamilluunniit akuersissummik nassataqassallutik.
- Kommune Kujallermi Covid-19-imik tunillatsissimasoqanngilaq, tamatumalu ataavartinnissaanut pisortat peqqussutaat malilllugit immitsinnut paarinerput ingerlatiinnassavarput, neriuppungalu kapitinnissamut periarfissaq innuttaasunit atorluarneqassasoq, Stine Egede oqarpoq.